طالبان: د پنجشېر ۳۰ سلنه اوسېدونکي د زمردو په استخراج کې بوخت دي

د پنجشېر سیمه ییز چارواکي وایي، چې د دې ولایت ۳۰ سلنه اوسېدونکي د زمردو په استخراج کې بوخت دي.

د طالبانو ترواک لاندې باختر خبري اژانس د دې ولایت د کانونو او پټرولیم رییس محمد قاسم امیري له قوله راپور کړی، چې یوازې د حصه اول ولسوالۍ ۲۰ سلنه اوسېدونکي د زمردو د استخراج په برخه کې بوخت دي.
د نوموړي په وینا، یادې ډلې تراوسه شاوخوا ۶۰۰ کسانو ته د ګران بیه او نیمه ګران بیه ډبرو د استخراج لپاره جوازونه ورکړي دي.
دا په داسې حال کې ده، چې طالبانو واک ته له رسېدو سره سم په افغانستان کې، د تېلو، ګازو، ډبرو سکرو او قیمتي ډبرو د کانونو اېستلو ته پاملرنه زیاته کړې ده.
دغې ډلې په تېرو نږدې څلورو کلونو کې د افغانستان د بېلابېلو کانې زېرمو اېستلو قرادادونه د چین او یو شمېر نورو هېوادونو په ګډون کورنیو شرکتونو ته هم ورکړي دي.
اخوا، په دغې ډلې بیا تور دی چې د افغانستان د کانې زېرمو په اېستلو کې پراخ فساد کوي او کانونه هم په نامعیاري ډول سپړي.