د اسراییل لومړي وزیر بنیامین نتنیاهو د برېتانیا، فرانسې او کاناډا د مشرانو وروستي ګډ بیان ته په غبرګون کې چې پکې د اسراییل پر وړاندې د نورو اقداماتو په ګډون د هدفمندو بندیزونو ګواښ شوی، وویل: «تاسو په اصل کې د اکټوبر ۷مې د نسلوژنې برید عاملانو ته جایزه ورکوئ.»
د نوموړي په خبره، په غزه کې به جګړې هغه وخت پای ته ورسېږي، چې پاتې یرغمل شوي کسان خوشې شي، حماس خپلې وسلې پر ځمکه کېږدي، د حماس مشران تبعید ته ولاړ شي او غزه خلع سلاح شي.
دا په داسې حال کې ده، چې انګلستان، فرانسې او کاناډا د دوشنبې په ورځ په غزه کې د اسراییل پراخ بریدونه وغندل او ګواښ یې وکړ، که چېرې اسراییل تازه بریدونه ونه دروي او د بشري مرستو بندیز لرې نه کړي، د دوی له اقداماتو سره به مخ شي.
اسراییل د مارچ له دویمې راهیسې غزې ته د مرستو لړۍ درولې ده، مګر د یکشنبې په ورځ یې اعلان وکړ، چې دوی به د اکمالاتي لاریو محدود شمېر ته اجازه ورکړي.
تازه د انګلستان، فرانسې او کاناډا هېوادونو په یوه ګډ بیان کې راغلي «موږ به د نتنیاهو حکومت د دې ناوړه کړنو تعقیبولو پر دوام چوپ پاتې نه شو.»
دوی وویل: «موږ ژمن یو چې د دوه اړخیزې حل لارې ترلاسه کولو لپاره د فلسطین دولت د ونډې په توګه وپېژنو او د دې هدف لپاره له نورو سره کار کولو ته چمتو یو.»
دا بیان د ۲۲ هېوادونو په ګډون د انګلستان، فرانسې او کاناډا له خوا د ګډې غوښتنې سره سمون لري، چې اسراییل باید سمدلاسه «غزې ته د مرستو رسولو بشپړ بیا پیل ته اجازه ورکړي.»
