د دوشنبې په ورځ د اتریش د کورنیو چارو وزیر ګیرهارد او د هغه فرانسوي سیال برونو رېتایو د پاریس په ناسته کې افغانستان ته د افغان پناه غوښتونکو پر شړلو او په درېیمو هېوادونو کې د کډوالو د ستنولو د مرکزونو په اړه خبرې کړې دي.
کارنر له غونډې وروسته وویل، چې « د پناه غوښتنې یو سخت او عادلانه سیاست کې باید شړنې هم شاملې وي. اتریش او فرانسه له جرمني سره یو ځای کار کوي چې افغانستان ته شړنې ممکنې شي».
د اتریش د دیر ستندرد د رپوټ له مخې، د اتریش د کورنیو چارو وزارت له خوا په خپره شوې اعلامیه کې راغلي، دواړو وزیرانو دا ټینګار هم وکړ چې د اروپايي ټولنې د پناه غوښتنې او مهاجرت ګډ تړون باید ژر تر ژره پلی شي.
په اعلامیه کې ویل شوي، «په ځینو برخو کې د سختو اقداماتو اړتیا شته».
د دواړو هېوادونو چارواکو دا هم ویلي چې د کډوالو د ستنولو لپاره په درېیمو هېوادونو کې د اخراج مرکزونه ډېر اړین دي.
په یوه جلا ناسته کې، د اتریش د اروپايي چارو وزیرې کلاودیا پلاکولم د پاریس د سفر پر مهال له خپل فرانسوي سیال بنجمن حداد سره لیدلي.
د اتریش د کورنیو چارو وزارت د خبرپاڼې له مخې، په دې ناسته کې د افراطیت، یهود ضد کرکې او انټرنېټ کې د نفرت خپرولو پر ضد مبارزه د خبرو اصلي بحث و.
فرانسې او اتریش پرېکړه کړې چې په دې برخه کې د اروپايي اتحادیې شورا راتلونکې ناستې ته، چې په بروکسل کې به جوړه شي، یوګډ اروپايي نوښت وړاندې کړي.
