د هند د بهرنيو چارو وزارت مرستيال وېکرم میسري وایي، چې د هند او پاکستان ترمنځ اوربند دوه اړخیزه و. هغه د دوشنبې په ورځ د دغه هېواد پارلماني کمیټې ته په خبرو کې ویلي، چې د «هند او پاکستان د اوربند په خبرو کې امریکا کوم رول نه لاره.»
انډیا ټوډې ورځپاڼې د نوموړي په حواله لیکلي، چې د پوځي اقداماتو د درولو پرېکړه د دواړو هېوادونو ترمنځ په دوه اړخیزه کچه شوې ده.
دغه څرګندونې وروسته له هغه وشوې، چې د اپوزیسیون ځینو غړو د اوربند په برخه کې د امریکا د ولسمشر ډونالډ ټرمپ د تکراري ادعاوو په اړه پوښتنې وکړې.
د هند پارلماني کمیټې یو غړي پوښتنه وکړه:« ټرمپ لږ تر لږه اووه ځلې ادعا وکړه، چې هغه د اوربند په برخه کې منځګړیتوب کړی دی. هند ولې چوپ خوله و؟»
