په غزه کې پر یوې مدرسې او بېلابېلو سیمو کې د اسراییل په تازه بریدونو کې ۳۸ کسان وژل شوي
العربیه د روغتیایي سرچینو په حوالې راپور ورکړ، چې په غزه کې پر یوې مدرسې او بېلابېلو نورو سیمو کې د اسراییل په تازه بریدونو کې ۳۸ کسان وژل شوي. د راپور له مخې، یو برید په دیرالبلح کې شوی، چې ویل کېږي پکې لس کسان وژل شوي دي.
دا په داسې حال کې ده، چې د دوشنبې په ورځ د غزې په سوېل خان یونس کې سلګونو کسانو د حماس پرضد لاریون وکړ.
دغو لاریونوالو چې د حماس ضد شعارونه ورکول، د جګړو د پای ته رسېدو او له واک څخه د حماس د لرې کېدو غوښتنه کوله.
اخوا اسراییلي پوځ بیا خبرداری ورکړی، چې د حماس د بنسټیزو زېربناوو د له منځه وړلو لپاره یوه «بېساري برید» ته چمتووالی نیسي..