د هند لومړي وزیر نریندرا مودي ویلي چې پاکستان به د هر ترهګریز برید لپاره سخت قیمت ورکوي او د دغه هیواد پوځ او اقتصاد به دواړه تاوان ویني، ځکه اسلاماباد د مخامخ جګړې پرځای ترهګري د هند پر ضد د جګړې وسیله ګرځولې. مودي وايي، پاکستان ته یوڅاڅکی اوبه هم نه ور کوي.
مودي دا څرګندونې د پنجشنبې په ورځ د راجستان په بیکانیر ولسوالۍ کې د پرمختیایي پروژو د پرانیستې پر مهال وکړې.
نوموړي وویل، پاکستان ته به له هغو سیندونو څخه چې هند پرې حق لري، یو څاڅکی اوبه هم ورنهکړل شي او له اسلاماباد سره د خبرو لپاره هېڅ موقع نهشته.
نوموړي وویل، « پاکستان به د هر ترهګریز برید دروند قیمت ورکوي، د پاکستان پوځ به یې قیمت ادا کوي، د پاکستان اقتصاد به یې قیمت ادا کوي».
مودي وویل، « سندور عمليات د نوي هند نښه ده، چې ترهګر به د هغوی په مرکزونو کې له منځه وړي».
هغه زیاته کړه: « ډزې په پهلګام کې وشوې، خو درد یې د میلیونونو هندوانو زړونو ته ورسېد. موږ پرېکړه وکړه چې ترهګر له منځه یوسو او ستاسې د دعاوو او زموږ د زړورو ځواکونو په مرسته مو دا وعده پوره کړه».
د هندوستان ټایمز د رپوټ له مخې، مودي وویل، « نړۍ او د هیواد دښمنانو ولیدل چې کله سندور بارودو ته واوړي، څه پېښیږي».
نوموړي وویل، «هغوی چې هڅه یې کوله د ښځو سندور له منځه یوسي، پخپله خاورې شول. زما رګونو کې وینه نه، بلکې سندور بهیږي».
مودي وویل، د هند پوځ ته یې بشپړه ازادي ورکړې او هغوی پاکستان ګونډه کېدو ته اړ کړ.
نوموړي وویل، « سندور عملیات انتقام نه و، بلکې د عدالت نوی تعریف و، د نوي هند استازیتوب. مخکې به موږ یوازې ځواب ورکولو، اوس مو پریکړه کړې چې لومړی وار به موږ کوو. دا د ترهګرۍ ختمولو لپاره زموږ نوی سیاست دی».
د هند لومړی وزیر وايي، چې هند د پاکستان د د اتومي وسلو ډار درواغ ثابت کړل او نور به نه وېرېږي او نه به د ترهګرو مشرانو او د هغوی ملاتړ کوونکو حکومتونو تر منځ توپیر کوي.
مودي وویل، چې هند نړۍ ته د پاکستان اصلي څېره ښودلې او نهه پارلماني او د نړیوالو اړیکو استازي به نورو هیوادونو ته ولاړ شي، چې د پاکستان واقعیت نړۍ ته وښيي.
