طالبان په پنجشېر کې نوي پوځي تاسیسات او جوماتونه جوړوي
د طالبانو د کورنیو چارو وزارت ویاند وايي، چې دغه ډله پلان لري پنجشېر کې نوي پوځي او امنیتي تاسیسات او همداراز جوماتونه جوړ کړي. د عبدالمتین قانع په وینا، د پنجشیر د پولیسو قوماندانۍ، د ابشار ولسوالۍ د پولیسو قوماندانۍ، او پنځو امنیتي پوستو په کډون به نهه نوې ودانۍ جوړې شي.
همداراز طالبانو پلان لري، چې د حصه اول، رخه او دره ولسوالیو کې نوي جوماتونه جوړ کړي.
د پنجشیر ولایت مرکز په بازارک کې یوه پنځه پوړیزه نوې ودانۍ د طالبانو د پولیسو قوماندانۍ لپاره جوړېږي.
د خبرپاڼې له مخې، طالبان غواړي چې د دې ولایت د مستوفیت ودانۍ ترڅنګ د پنجشېر د لوړو زدهکړو په موسسه کې د یو جومات او یو لیلیې ودانۍ جوړه کړي.
پنجشیر هغه وروستی ولایت و، چې د ۱۴۰۰ هجري لمریز کال د تلې په میاشت کې، د سختو جګړو وروسته د طالبانو لاس ته ولوېد.
طالبان له تلې ۱۴۰۰ کال راهیسې په پنجشېر کې خپل پراخ پوځي حضور ساتلی دی.
د طالبانو کنټرول په پنجشېر کې د پراخو بشري حقونو د نقض، بېمحاکمې وژنو او د ملکي خلکو پراخو نیونو سره مل و.