د ترکي ژبو هیوادونو سازمان په افغانستان کې د ټولګډونه حکومت د جوړېدو غوښتنه وکړه
د ترکي ژبو هېوادونو سازمان په ګډه اعلامیه کې ویلي، چې د افغانستان د ثبات لپاره له افغانانو سره د نړیوالو بشري مرستو ملاتړ کوي او د ثبات، پرمختګ او ملي پخلاینې په برخو کې له طالبانو سره کار کولو ته چمتو دي. دغه سازمان په افغانستان کې د ټولګډونه حکومت د جوړېدو غوښتنه وکړه
د اعلامیې له مخې، د ترکي ژبو هېوادونو سازمان د افغانستان له خاورې څخه د ترهګرۍ د له منځه وړلو لپاره له طالبانو سره پر همکارۍ ټینګار کړی او د ټاپي، افغان ټرانس، کاسا زر او د ورېښمو لارې پروژې یې د افغانستان د اقتصادي ثبات لپاره مهمې وبللې.
د یادولو وړ ده، چې ترکیه، اذربایجان، قزاقستان، قرغزستان او ازبکستان د دغه سازمان دایمي غړي او مرکز یې په استانبول ښار کې دی.