د تهران د پولیسو قوماندان: تېر کال مو یو مېلیون او ۲۰۰ زرو غیر قانوني کډوال اېستلي دي
د تهران د پولیسو قوماندان وایي، چې په تېر یوه کال کې له دغه هېواد څخه څه باندې یو مېلیون او ۲۰۰ زره غیر قانوني کډوال اېستل شوي دي. ایراني رسنیو د تهران د پولیسو د قوماندان له قوله راپور ورکړی، چې یوازې له تهران څخه ۲۷۰ زره کسان اېستل شوي دي.
که څه هم ایراني رسنیو په مشخص ډول نه دي ویلي چې په یاد شمېر کډوالو کې د کومو هېوادونو وګړي شامل دي، خو یو لړ نور راپورونه ښيي چې په ۲۰۲۴ کال کې له ایران څخه شاوخوا یو مېلیون افغانان راستانه شوي دي.
د طالبانو د کډوالو ستونزو ته د رسېدو عالي کمېسیون وایي، چې یوازې په تېرو ورځو کې ۸۷۹ افغانې کډوالې کورنۍ چې ۳۶۷۸ کسان پکې شامل دي، له ایران او پاکستان څخه په زوره افغانستان ته ستانه کړای شوي دي.
افغانستان چې د اسیا تر ټولو لوی داخلي بېځایه کېدو ناورین لري، اوس د کډوالو له پراخ ناورین سره مخ دی.