د طالبانو د لوړو زده کړو وزیر هرات ولایت ته د سفر په ترڅ کې د هرات پوهنتون د علمي شورا غړو سره ناسته کې پر دیني او عصري علومو ټينګار کړی او زیاته کړې یې ده، چې افغانستان په ټولو برخو کې متخصصینو ته اړتیا لري.
یاد وزارت د یوې خبرپاڼې په خپرولو سره ویلي، چې ندیم په دې ناسته کې د هبت الله اخوندزاده د فرمانونو پر بشپړ پلي کېدو هم ټينګار کړی دی.
د طالبانو د لوړو زده کړو وزیر ویلي: «اسلامي امارت دواړو برخو هم دیني علومو او هم عصري علومو ته ځانګړې پاملرنه کوي، زموږ هېواد په ټولو برخو کې هم زراعت هم په انجنیري او هم په نورو علومو کې متخصصینو ته اړتیا لري.»
په داسې حال کې چې ملاهبت الله او د هغه یو شمېر نږدې کسان عصري زدهکړو ته چندان ارزښت نه ورکوي؛ خو د دغه ډلې ځيني غړي بیا وایي، چې په نړۍ کې پرمختللو هېوادونو د عصري علومو او کار اهل کار ته د سپارلو پر مټ نور هېوادونه تر خپل اغېز لاندې راوستي.
ندیم دغه خبرې په داسې حال کې کوي، چې طالبانو په تېرو څو ورځو کې د کابل ننګرهار، خوست، پکتیا، بدخشان او بامیان له پوهنتونونو نه سلګونه استادان او اداري کارکوونکي د «تنقیص» په نوم له دندو ګوښه کړي دي.
پر افغانستان د طالبانو له واکمنېدو وروسته په علمي او تخصصي مرکزونو کې د اکاډمیکو کسانو ګوښهکېدل په سېستماتیک ډول روان دی او یاده ډله هڅه کوي، چې په دې ځایونو کې له خپلې ایډيالوژۍ سره جوړ او د مدرسو ملایان وګوماري.
د ملاهبت الله په ګډون د هغه سخت دریځه ملګرو په وار-وار د عصري او پوهنتوني زدهکړو پر ضد د څرګندونو تر څنګ ځیني اقدامات هم کړي دي.
د ملاهبت الله په امر د هېواد د یو شمېر ښوونځیو او پوهنتونو ودانۍ مدرسو ته ځانګړې شوي او د دغه ډلې د افراطي افکارو له مخې پکې طالباني مدرسې جوړې شوې دي.
د طالبانو د لوړو زده کړو وزیر هرات ولایت ته د سفر په ترڅ کې په چارو کې پر اخلاص، اتفاق ساتنې او د اولي الامر پر اطاعت ټينګار کړی.
هغه زیاته کړه: « هر مسوول باید په خپله دنده کې احساس د مسوولیت ولري او د اسلامي امارت اصول پوره مراعات کړي، ځکه په اسلامي نظام کې هر مسوول د امیرالمومنین استازولي کوي.»
دا په داسې حال کې ده، چې طالبان بیا پر دې تورن دي چې خپل مسوولیتونه په سمه توګه سر ته نه رسوي او دغه راز ډېری وخت د عامو خلکو د ځورونې لامل کېږي.
