جرمني د غزې د وضعیت له امله اسراییل ته خبرداری ورکړی
د جرمني د بهرنیو چارو وزیر یوهان وادېفول د سې شنبې په ورځ د اسراییل پر ضد د نامعلومو اقداماتو ګواښ وکړ او ویې ویل، برلین به هغه وسلې اسراییل ته صادرې نه کړي چې د بشري قوانینو خلاف وکارول شي.
د جرمني د بهرنیو چارو وزیر یوهان وادېفول د سې شنبې په ورځ د اسراییل پر ضد د نامعلومو اقداماتو ګواښ وکړ او ویې ویل، برلین به هغه وسلې اسراییل ته صادرې نه کړي چې د بشري قوانینو خلاف وکارول شي.
دغه څرګندونې، چې د صدراعظم فریدریښ مېرڅ له خوا هم تایید شوې، د غزې په تړاو د جرمني تر ټولو جدي انتقاد ګڼل کیږي.
د رویترز د رپوټ له مخې، جرمني حکومت له دویمې نړیوالې جګړې وروسته ځان د اسراییل پر وړاندې ځانګړی مسوول بولي، خو د غزې د اوسني وضعیت له امله د برلین دریځ بدلون موندلی.
دغه څرګندونې په داسې حال کې دي چې اروپایي ټولنه، بریتانیا، فرانسه او کاناډا هم پر اسراییل فشار راوړلو ته چمتو شوي دي.
وادېفول له ډبلیو ډي ار تلویزیون سره په مرکه کې وویل: « زموږ تاریخي ملاتړ باید د غزې د اوسني وضعیت لپاره ونه کارول شي».
صدراعظم مېرڅ، چې د فبرورۍ په انتخاباتو کې بریالی شوی، فنلنډ کې په یوه خبري ناسته کې وویل: « پر غزې د اسراییل هوایي بریدونه نور د حماس پر ضد د جګړې اړتیا نه توجیه کوي او نه هم د فهم وړ دي».
نوموړي دا ونه ویل چې ایا جرمني به اسراییل ته د وسلو صادرات بند کړي که نه، خو وادېفول وویل چې دغه تصمیم د امنیتي شورا له خوا نیول کېږي او دا شورا د صدراعظم تر مشرۍ لاندې کار کوي.
