نریندرا مودي: د وژل شویو ترهګرو جنازې د پاکستان تر بیرغ لاندې وشوې
د هند لومړي وزیر نریندرا مودي اعلان وکړ چې د پاکستان جګړه نوره نیابتي نه ده، ځکه د وژل شویو ترهګرو جنازې د پاکستان تر بیرغ لاندې د پوځ په سلامۍ وشوې.
د هند لومړي وزیر نریندرا مودي اعلان وکړ چې د پاکستان جګړه نوره نیابتي نه ده، ځکه د وژل شویو ترهګرو جنازې د پاکستان تر بیرغ لاندې د پوځ په سلامۍ وشوې.
مودي، چې د هند د ګجرات ایالت په ګاندهينگر ښار کې یوې غونډې ته وینا کوله، وویل، چې د پاکستان پر ضد د سندور عملیاتو پر مهال ټول مرکزونه د کمرو پر وړاندې له منځه وړل شوي او دا کار ددې لپاره شوی، چې نور څوک ثبوتونه او شواهد ونه غواړي.
هغه زیاته کړه، « دا د زړورو خلکو خاوره ده. تر دې وړاندې به مو ترهګري نیابتي جګړه بلله، خو د می له۶مې وروسته چې کومې صحنې ولیدل شوې، نور دا تېروتنه نهشي کېدای. کله چې ۹ ترهګریز مرکزونه تشخیص او په ۲۲ دقیقو کې ختم شول، دا یو قاطع اقدام و او دا ځل ټول عملیات د کمرې پر مخ وشول، څو خلک ثبوت و نهغواړي».
نوموړي وویل، چې د می له شپږمې وروسته وژل شوي ترهګر د پاکستان د دولت له خوا تر ملي بیرغ لاندې ښخ شول او اردو یې ورته سلامي وکړه. نوموړی وايي، دا څرګندوي چې دا فعالیتونه تصادفي نه، بلکې د یوې سنجول شوې نظامي ستراتیژۍ برخه دي.
د هندوستان ټایمز د رپوټ له مخې، مودي په خپلو خبرو کې وویل، « زه وایم، دا نوره نیابتي جګړه نه ده. هغه ترهګر چې د می له شپږمې وروسته یې جنازې وشوې، د پاکستان تر بیرغ لاندې ښخ شول او اردو یې درناوی وکړ. دا ثابتوي چې ترهګري یوه سنجول شوې جنګي ستراتیژي ده. تاسې لا له وړاندې په جګړه کې یاست او مناسب ځواب به درکړل شي. موږ له هېچا سره د دښمنۍ هوډ نه لرو. موږ سوله غواړو، پرمختګ غواړو او د نړۍ په هوساینه کې ونډه اخلو».
تر وینا وړاندې، مودي د ګاندهينگر ښار له راج بهون څخه تر مهاتما مندر پورې ستر لاریون وکړ، چې زرګونه خلک پکې له هندي بیرغونو سره شریک وو.
