د پاکستان د قامي اسمبلۍ پخوانی غړی او د پښتون ژغورنې غورځنګ مخکښ غړی علي وزیر چې د ۱۴۰۳ کال (د زمري په ۱۳مه نېټه) په اسلام اباد کې د پولیسو لهخوا نیول شوی و؛ لاهم د پاکستان حکومت په زندان کې دی.
د پاکستان پخواني سناتور مشتاق احمد پر اېکس پاڼه د یوه ویډیويي پیغام په خپرولو سره د نوموړي د خلاصون غوښتنه کړې.
په دغه ویډیو کې نوموړي ویلي، چې له سوېلي وزیرستان څخه قومي مشران د علي وزیر د خلاصون لپاره اسلام اباد ته ورغلي او په دې اړه یې د نوموړي سره هم لیدلي دي.
هغه وایي، علي وزیر له اوږدې مودې راهیسې له کوم جرم پرته زنداني شوی، چې یوازې درې میاشتې یې په ګجرات زندان کې تېرې کړې دي، بیا سرګودې، کراچۍ او نورو زندانونو ته هم لېږدول شوی دی.
هغه زیاته کړې، چې علي وزیر له کوم جرم پرته د پښتونخوا پرته د ټولو ایالتونو په بېلابېلو زندانونو کې ساتل شوی دی.
د سناتور مشتاق احمد په وینا، علي وزیر تل د خپلې سیمې د امن لپاره غږ اوچت کړی او د خپلو خلکو د حقونو غوښتنه یې کړې.
ښاغلي مشتاق احمد ویلي، چې علي وزیر د پښتورګو ترڅنګ ځینې نورې روغتیایي ستونزې هم لري او په دغه ګرمه هوا کې هغه په زندان کې سخت ربړول شوی هم دی.
هغه له حکومته غوښتي، چې علي وزیر ژر تر ژره او بې له کوم قید و شرطه خوشې کړي.
نوموړي ویلي، چې علي وزیر د تېر حکومت پرمهال هم د ۲۴میاشتو لپاره له کوم جرم پرته زنداني شوی و.
ښاغلي مشتاق احمد په خپلو خبرو کې په میرعلي کې وروستیو ډرون بریدونو ته هم اشاره کړې او هغه یې شرموونکې بللي دي.
هغه پر حکومت غږ کړی، چې دغه بریدونه دې ژر تر ژره ودروي.
