حنیف پښتین: د میرعلي اعتراضي پرلت تر اتو ورځو وروسته پای ته ورسېد
د شمالي وزیرستان د میرعلي په سیمه کې د پاکستاني پوځ لهخوا د څلورو ماشومانو د وژل کېدو او د ډرون بریدونو پر ضد پیل شوی اعتراضي پرلت چې له تېرو اتو ورځو راهیسې یې دوام درلود، د مذاکراتو په پایله کې پای ته ورسېد.
د پښتون ژغورنې غورځنګ یا پيټياېم یوه مخکښ غړي حنیف پښتین د دوشنبې په ورځ پر خپلې اېکسپاڼې لیکلي، چې د پاکستاني پوځ له استازو سره د خبرواترو په پایله کې هغوی ژمنه کړې چې په وزیرستان کې به پر عامو خلکو ډرون بریدونه نه ترسره کوي.
پښتین خبرداری ورکړی، که پاکستانی پوځ خپلې ژمنې ماتې کړي، ولس به د هر ډول مقاومت لپاره تیار وي.
نوموړي د تېرې تجربې له مخې یادونه کړې، چې تر دې وړاندې هم ورته ژمنې شوي، خو عملي شوي نه دي.
نوموړي همداراز له هغو خلکو مننه کړې، چې د دغې اعتراضي مبارزې ملاتړ یې کړی دی او زیاته کړې یې ده چې د ظلم او جبر پر وړاندې به تل غږ پورته کوي.
د پښتون ژغورنې غورځنګ په شمالي وزیرستان میرعلي کې د پاکستاني پوځ لهخوا د څلورو ماشومانو د وژلکېدو په غبرګون کې د میرعلي پوځي چوڼۍ مخې ته احتجاجي پرلت پیل کړی و.
د یادونې ده، چې دا پرلت د سیمهيیزو خلکو لهخوا د ناامنۍ، بېعدالتیو او د ملکي تلفاتو پر خلاف د احتجاج یوه هڅه وه چې پراخ ولسي ملاتړ یې له ځان سره درلود.