د طالبانو د کرنې، اوبولګولو او مالدارۍ وزیر عطاءالله عمري وایي، په تېرو نظامونو کې جوړ شوي جعلي اسناد باید هېڅکله د اعتبار وړ ونه ګڼل شي. هغه زیاته کړې، یوازې هغه اسناد چې قانوني حیثیت لري او اساسي بڼه یې پاتې وي، باید د اعتبار وړ وګڼل شي.
عمري دا څرګندونې د چهارشنبې په ورځ (د غبرګولي ۷مه) د یاد وزارت د اراضۍ ریاست له لوري د یوه روزنیز ورکشاپ پرانیسته کې وکړې.
عمري په خپلو خبرو کې وویل، چې د ځمکو شته ستونزې د هېواد لپاره یوه جدي ننګونه ده او یوازینۍ حللارهیې د مسلکي پوهې، قانونمحورې دندې او صداقت له لارې ممکنه ده. هغه زیاته کړه، چې له کلونو راهیسې د هېواد په کچه د ځمکو پر سر شخړې او لانجې دوام لري، چې حلیې د کارکوونکو د شرعي، اخلاقي او اداري مسوولیت برخه ده.
عمري د یاد وزارت د اراضۍ کارکوونکو ته وویل چې خپل موقف، او مسوولیت درک کړي، او له دوه لارو څخه دې یوه غوره کړي. د هغه په وینا یوه لار خدمت، صداقت او ایمانداري ده، چې له دې لارې به دنیا او اخرت دواړه عزتناک وي او بله لار خیانت ده چې جعل او له دندې څخه ناوړه استفاده ده، چې پایله یې دنیا او اخرت کې ذلت او رسوایي ده.
د طالبانو د کرنې، اوبولګولو او مالدارۍ وزارت په وینا، یاد روزنیز ورکشاپ د اراضۍ په برخه کې د اصلاح، شفافیت او موثریت لپاره یو مهم ګام بلل شوی، چې تمه کېږي د مسلکي ظرفیتونو د لوړوالي له لارې به د ځمکو پر شخړو، د اسنادو د جعل پر مخنیوي او د ناوړه استفادو پر کنټرول اغېزمن اثر ولري.
