روسیې ته د شمالي کوریا پوځي مرسته؛ اوکراین باندې توغندیز بریدونه زیات شوي
د ملګرو ملتونو د بندیزونو څارنې یوې ډلې ویلي، شمالي کوریا روسیې ته تر ۲۰ زرو کانټینرو ډېر مهمات برابر کړي، چې له امله یې روسیه وتوانېدلې د اوکراین پر مهمو ملکي تاسیساتو توغندیز بریدونه زیات کړي.
راپور زیاتوي، دواړو هېوادونو له ۲۰۲۳ راهیسې پراخه پوځي همکاري پيل کړې، چې له مخې یې شمالي کوریا زرګونه توپچي مهمات او بالستیک توغندي روسیې ته ورکړي، او روسیې په بدل کې د توغندیو د دقیقې لارښوونې معلومات، هوايي دفاعي سیستمونه او نور پوځي وسایل ورکړي.
همداراز ویل شوي، شمالي کوریا سږ کال د روسیې د ملاتړ لپاره پوځیان اوکراین ته استولي، چې دا د دوی د ستراتیژیک دفاعي تړون برخه ده. دا هر څه د ملګرو ملتونو د بندیزونو ښکاره سرغړونه بلل شوې.