د روغتیا نړیوال سازمان: په افغانستان کې د تنباکو استعمال اندېښمن حالت ته رسېدلی

د روغتیا نړیوال سازمان، «تنباکو ته نه» د نړۍوالې ورځې په مناسبت په یوه تازه راپور کې ویلي چې په افغانستان کې د تنباکو کارونه اندېښمن کوونکي حالت ته رسېدلی او دا چاره د عامې روغتیا لپاره جدي ګواښ بلل کېږي.

د دغه سازمان د شمېرو له مخې، له هر څلورو افغانانو څخه یو تن تنباکو کاروي. په راپور کې ویل شوي، چې نسوار چې یوه ارزانه او اسانه ژولېدونکې تنباکو ده،د خلکو ترمنځ تر ټولو ډېر کارول کېږي، په ځانګړي ډول په کلیوالو او ښاري سیمو کې.

یاد سازمان خبرداری ورکړی،چې د تنباکو صنعت په مشخص ډول ځوانان، په تېره بیا هلکان، په نښه کوي او د هغوی ترمنځ د تنباکو کارونه ورځ تر بلې زیاتېږي.

سازمان زیاتوي، تنباکو د سږي سرطان، د زړه ناروغیو او نورو خطرناکو تنفسي ستونزو اصلي لامل دی، چې د افغانستان پر نازک روغتیايي سیستم دروند فشار واردوي.

د یاد سازمان په خبره، د تنباکو د استعمال مخنیوي لپاره باید بېړني ګامونه پورته شي، چې پکې د تنباکو پر محصولاتو مالیه لوړه کول، د هغو پر اعلانونو بندیز او کشرانو ته د پلور مخنیوی شامل دي. همداراز، پراخ عامه پوهاوی باید پیل شي څو خلک د تنباکو له زیانونو خبر شي.

دا په داسې حال کې ده چې طالبانود واک تر نیولو وروسته د تنباکو پر خرڅلاو محدود بندیزونه لګولي، خو د دغو قوانینو پلي کېدل کافي نه دي بلل شوي.

نن شنبه. (د می ۳۱مه) د تنباکو نړۍوالې ورځې سره سمون لري؛ نړۍ دا ورځ داسې مهال نمانځي، چې شاوخوا ۱.۳ میلیارده خلک په کې تنباکو کاروي. که څه هم تنباکو هر کال په نړۍ کې اته میلیونه انسانان وژني؛ خو بیا یې هم خلک کاروي او په استعمال کې یې د پام وړ کمی نه دی راغلی.