د ترکیې د دیني چارو بنسټ ویلي، چې په لوی اختر کې به ۸ زره او ۴۰۰ برخې قرباني شوې غوښه اړمنو افغانان ته ووېشي. یاد بنست زیاتوي، چې د قربانۍ غوښه به د شنبې په ورځ په پنخو بېلابېلو سیمو کې ووېشل شي.
د ترکیې د دیني چارو بنسټ د جمعې په ورځ (دغبرګولي ۱۶مه) ویلي، چې د دوی رضا کاره کارکوونکي کابل ته تللي، د قربانۍ لپاره یې څاروي پېریدلي او اړمنو ته یې د وېش تابیا کړې ده.
د دوی په خبره کارکوونکو یې له هغه مسلخونو (ذبحه ځایونو) څخه هم لیدنه کړې، چې قرباني پکې ترسره کیږي.
د ترکیې د سفارت د دیني چارو استازي همراه کاندمیر ویلي، چې زر برخې غوښه به اړمنو ته په پنځوو سیمو کې ووېشل شي.
نوموړي زیاته کړه:« ټول چمتوالی بشپړ شوی، مسلخونه چمتو دي، د وېش لپاره لازم پلان جوړ شوی او زموږ د اختر د پیل انتظار کوو. په دې لاره کې له ټولو هغو وړونو مننه کوم چې مرسته یې کړې ده.»
یاد بنسټ تېرکال په لوی اختر کې هم په کابل، هرات او مزارشریف کې له ۱۳ زره دېرو اړمنو ته د قربانۍ غوښه وېشلي وه.
دا په داسې حال کې ده، چې د ترکیې په ګډون ګڼو اسلامي هېوادونو د جمعې ورځ او طالبانو بیا د شنبې ورځ د لوی اختر ورځ اعلان کړې.
په کندهار کې د طالبانو د حج او اوقافو ریاست د لوی اختر د لمونځ لپاره په کندهار ښار کې د ۱۵ جوماتونو نومونه اعلان کړې دي.
د حج او اقافو ریاست له خوا په یادو جوماتونو کې د تقریر کوونکو طالبانو نومونه هم اعلان کړي دي.
د دغه ولایت د حج او اقافو له لوري په خپرې شوې خبرتیا کې ویل شوي، چې په هر جومات کې به د اختر لمونځ څخه وړاندې یونیم ساعت تقریرونه هم وشي.
پر همدغه مهال طالبانو د تېرو څلورو ورځو راهیسې په کندهار ښار او ځانګړې توګه د اختر لمونځ لپاره د ځانګړو شویو جوماتونو په شاوخوا کې امنیتي تدابیر سخت کړي دي.
د کندهار ښار یو شمېر اوسیدونکو له افغانستان انټرنشنل ـ پښتو سره په خبرو کې ویلي، چې د طالبانو له خوا د امنیتي تدابیرو په پلمه ځورول کیږي او په هر څو متره واټن کې تلاشي کیږي.
د کندهار ښار یو اوسیدونکي د نوم نه ښودلو په شرط وویل:« هغه مسجدونه چې د اختر لمونځ په کې کیږي، د هغې شاوخوا کې طالبان ځای پرځای شوي دي. د ښار په هر څو مترو کې د تلاشۍ لپاره طالبان ولاړ دي او خلک تلاشې کوي، د ښار په مهمو ځایونو کې یې د وسایطو تګ راتګ بند کړی دی.»
همدارنګه د کندهار ښار یو شمېر اوسیدونکي شکایت کوي، چې د ښار په لومړۍ، دویمه، درېیمه او پنځمه حوزه کې د اختر لمونځ کولو لپاره ځانګړي شویو جوماتونو ته د ورتګ پرمهال د تېرو څلورو ورځو راهیسي تلاشي کیږي.
د طالبانو له خوا د لوی اختر لمونځ لپاره ځانګړو شویو جوماتونو له جملي څخه یو هم د کندهار ښار په نهمه حوزه کې د کندهار پوهنتون ته څېرمه مرکزي عیدګاه جومات دی.
نورو اخترو ته په کتو تمه ده، چې د طالبانو مشر ملا هبتالله اخوندازه به د اختر لمونځ لپاره یاد جومات ته ورشي.
د سیمي اوسیدونکي وايي، د تېرو څلورو ورځو راهیسي، د مرکزی عیدګاه جومات په شاوخوا کې ګڼ طالبان ځای پرځای شوي دي او جومات نه نږدې خلکو ته د تګ راتګ اجازه نه ورکوي.