د «وړیو او درملو لارې» جشنواره؛ افغانستان هم خپل دودیز هنرونه نندارې ته وړاندې کړي
د ازبکستان د دولتي رسنیو د راپور له مخې، د «وړیو او درملو لارې» په نوم دودیزه او فرهنګي جشنواره سږکال د افغانستان په ګډون د سیمې د یو شمېر هېوادونو لهخوا د بخارا په ښار کې پیل شوې ده.
په راپور کې همداراز راغلي، چې په دې جشنواره کې له افغانستان، ایران، روسیې، تاجکستان، ترکمنستان، قرغیزستان او یو شمېر نورو هېوادونو څخه له۵۰ زیاتو صنعتکارانو برخه اخیستې.
له دې سره، دغې جشنوارې ته د ازبکستان له بېلابېلو سیمو څخه تر ۲۰۰ ډېر هنرمندان او د معاصر هنر او لاسي صنایعو استادان هم ورغلي دي.
د دود له مخې، دغه جشنواره د رنګارنګ مارش سره پیل شوې ده چې د «ارګ» له تاریخي کلا څخه تر «لب حوض» معمارتي مجموعې پورې غځېدلې ده.
په راپور کې زیاته شوې، چې د دې جشنوارې پرانیسته په شانداره او خوښۍ ډک چاپېریال کې ترسره شوې.
په دې جشنواره کې ګڼ شمېر فرهنګي، هنري او دودیز پروګرامونه شامل دي، چې پکې ولسي موسیقي، د دودیزو جامو ننداره، ورزشي سیالۍ، د لاسي صنایعو ښوونیز ورکشاپونه، د وړیو توکي، دودیزو درملو او ملي لاسي محصولاتو بازارونه او د تجسمې هنرونو نندارتونونه شامل دي.
د دې جشنواره موخه د لاسي صنایعو دودونو ژوندی ساتل، د سیمهییزو هنرمندانو ملاتړ او د سیاحتي صنعت پراخېدل بلل شوي دي.
دغه فرهنګي نندارې د بخارا د تاریخي فضا له کبله د کورنیو او نړۍوالو مېلمنو پام ځان ته را اړولی دی.