روسیه په ایران کې اته اټومي بټۍ جوړوي
د ایران د اسلامي شورا د ملي امنیت او بهرنیو اړیکو د کمیسیون وایي، د روسیې او ایران ترمنځ د یو نوي تړون له مخې مسکو په ایران کې اته اټومي بټۍ جوړوي، چې څلور به یې په بوشهر ولایت کې وي.
د یاد کمیسیون ویاند ابراهیم رضایي دا څرګندونې د دوشنبې په ورځ د یاد کمیسیون د غړو له خوا د تهران د ریاکتور او راډیودارو د تولید مرکز له لیدنې وروسته وکړې.
هغه وویل، چې غړو د اتومی انرژۍ سازمان د فعالیتونو او پرمختګونو وضعیت له نږدې وکوت او د نویو اقداماتو په اړه یې مفصل معلومات ترلاسه کړل.
ایرنا اژانس وايي، د اټومي انرژۍ سازمان مشر د خپلو فعالیتونو او پلانونو راپور وړاندې کړ او د بوشهر د اټومي بټیو د دویم او درېیم واحد د جوړېدو په اړه یې وویل چې دا دواړه واحدونه یوازې د ایراني شرکتونو له خوا جوړ شوي دي.
رضایي زیاته کړه چې د دغه سازمان د مشر له قوله، د روسیې سره په لاسلیک شوي تړون کې راغلي چې مسکو به په ایران کې اته اټومي بټۍ جوړوي، چې څلور به یې په بوشهر کې وي.