په غزه کې د اسراییل په ډزو او هوايي بریدونو کې ۶۰ تنه وژل شوي دي
سیمهییز روغتیایي چارواکي وایي، د غزې په مرکز کې د اسراییل د ډزو او هوايي بریدونو له امله د چهارشنبې په ورځ لږ تر لږه ۶۰ فلسطینیان وژل شوي او لسګونه نور ټپیان دي.
سیمهییز روغتیایي چارواکي وایي، د غزې په مرکز کې د اسراییل د ډزو او هوايي بریدونو له امله د چهارشنبې په ورځ لږ تر لږه ۶۰ فلسطینیان وژل شوي او لسګونه نور ټپیان دي.
د دغه چارواکو په وینا؛ له دې ډلې ۲۵ کسان د بشري مرستو د وېش مرکز نتزاریم ته څېرمه په یوه برید کې وژل شوي دي.
د غزې په سوېلي تړانګه کې د خان یونس په ناصر روغتون کې روغتیایي چارواکي وایي، چې لږترلږه ۱۴ کسان د اسراییل د ډزو له امله وژل شوي دي.
د امریکا د بهرنیو چارو وزارت له خپلو وګړو غوښتي، چې عراق ته د امنیتي ګواښونو له امله سفر و نه کړي. د دې خبرداري لامل په عراق کې ترهګري، تښتونې، وسله والې نښتې، مدني ګډوډي او د بېړنیو خدمتونو لپاره د امریکا د دولت محدود توان بلل شوی دی.
یاد وزارت خپلو وګړو ته ویلي: «په هېڅوجه عراق ته سفر مه کوئ.»
دا په داسې حال کې ده، چې تر دې وړاندې واشنګټن پوسټ راپور ورکړ چې د امریکا حکومت په منځني ختیځ کې د خپلو سفارتخونو او پوځي اډو د خبرداري کچه لوړه کړې او د بېړني وتلو تدابیر یې فعال کړي دي.
جروزالم پوسټ ورځپاڼې د یوې باوري سرچینې په حواله خبر ورکړی، چې ښایي د ایران او امریکا ترمنځ د مذاکراتو شپږم پړاو ترسره نه شي. د سرچینې په خبره، د دې خبرو نه ترسره کېدل «په بشپړه توګه جدي احتمال» لري.
له بلې خوا، ټاکل شوې ده چې د اژانس د حکامو شورا د پنجشنبې په ورځ یوه پرېکړهلیک ته رایه ورکړي، چې پکې پر تهران د ځواب نه ورکولو او د ژمنو د سرغړونې تور لګول شوی دی.
دا په داسې حال کې ده، چې د ایران د بهرنیو چارو وزارت ویاند اسماعیل بقایي تېره ورځ وویل، چې له امریکا سره د اټومي خبرو بل پړاو د یکشنبې په ورځ (د غبرګولي ۲۵مه) په عمان کې ترسره کېږي.
له دې سره، د اسراییل لومړي وزیر بنیامین نتنیاهو بیا وړمه ورځ د امریکا له ولسمشر ډونالډ ټرمپ سره په خبرو کې خبرداری ورکړی و، چې ایرانیان د وخت د ضایع کولو متخصصین دي او له همدې امله باید پروړاندې یې یو ستر پوځي ګواښ وي.
ډونالډ ټرمپ بیا ویلي و، دی لا هم غواړي چې د ایران کړکېچ د بمونو پر ځای د خبرو اترو له لارې حل کړي.
د یادونې ده، چې تر دې وړاندې د ایران او امریکا ترمنځ د مذاکراتو پنځم پړاو د غبرګولي په ۲مه د اېټالیا په روم ښار کې ترسره شوی و او تمه کېده چې شپږم پړاو مذاکرات په عمان کې وشي.
سياېناېن تر دې وړاندې راپور ورکړی و، چې ښایي په دې ناسته کې ایران او امریکا وروستۍ هوکړې ته هم سره ورسېږي.
د امریکا د مرکزي قومندانۍ (سنټکام) قومندان جنرال مایکل اریک کوریلا د منځني ختیځ د تاوتریخوالي له زیاتوالي وروسته هغه راپور وځنډاوه، چې ټاکل شوې وه د امریکا د سنا د وسلهوالو ځواکونو کمېټې ته یې وړاندې کړي.
په دې ناسته کې باید امنیتي اندېښنې او د امریکا د پوځي ستراتیژیو ارزونه شوې وای.
امریکایي چارواکو نور جزیات نه دي وړاندې کړي او سنټکام هم تر اوسه د دې ځنډ د علت په اړه کوم رسمي بیان نه دی خپور کړی؛ له همدې امله د دې ځنډ دقیق علتونه لا هم د اټکل او ګومان په کچه پاتې دي.
د ایران د بهرنیو چارو وزیر عباس عراقچي او د ناروې د بهرنیو چارو وزیر اسپن بارت ایدي د اوسلو د ۲۲م نړۍوال کنفرانس په څنډه کې د افغانستان د تحولاتو په غږېدلي دي.
د ايران د بهرنيو چارو وزارت په یوه بیان کې ويلي، چې د دواړو هېوادونو د بهرنيو چارو وزيرانو په دې ليدنه کې د دوهاړخيزو اړيکو، سيمهييزو تحولاتو او نړۍوالو موضوعاتو په اړه نظرونه تبادله کړي دي.
د بیان پر بنسټ، د ايران او امريکا ترمنځ د خبرو اترو وروستی وضعیت او همداراز د افغانستان تحولات د دواړو خواوو د بحث مهم موضوعات بلل شوي دي.
په بیان کې د افغانستان په اړه د دواړو لوړپوړو چارواکو د خبرو اترو جزئیات نه دي خپره کړي.
ناروې یو له هغو لوېدیځو هېوادونو څخه دی، چې له طالبانو سره نږدې اړیکې لري.
تېرکال یې د اوسلو کنفرانس ته طالبان هم بللي و، خو سږکال یې د طالبانو ډېپلوماتانو ته د غونډې بلنه رد کړې ده.
د روان کال په پیل کې ناروې د طالبانو یو ډیپلومات هم ومانه او دغه طالب ډیپلوماټ نجیب الله شېرخان په ناروې کې د افغانستان د سفارت د لومړي سکرتر په توګه وټاکل شو.
د ناروې دا اقدام په اروپا کې د مدني ټولنې فعالانو او ښځینه لاریونکوونکو له پراخو غبرګونونو سره مخ شو.
ناروې لومړنی اروپايي هېواد و، چې په ۲۰۱۴ کال کې یې په اوسلو کې د امیر خان متقي په مشرۍ د طالبانو د لوړپوړي پلاوي کوربهتوب وکړ.
تر دې وروسته د ناروې د بهرنیو چارو وزارت وویل، چې د ښځو د دوامداره ځپلو له امله به له طالبانو سره خپلې اړیکې کمې کړې.
رويټرز د چهارشنبې په ورځ راپور ورکړی، چې امریکا هڅه کوي ځيني هېوادونه د اسراييل او فلسطين د مسلې لپاره د دوو دولتونو د حل لارې د ارزونې په موخه د ملګرو ملتونو په غونډه کې له ګډون څخه منع کړي.
د امریکا د بهرنیو چارو وزارت د محرم سند له مخې چې هېوادونو ته لېږل شوی، امریکا دغو هېوادونو ته خبرداری ورکړی، چې د اسراییل او فلسطین د شخړې په اړه د ملګرو ملتونو په غونډه کې ګډون ونه کړي.
واشنګټن په دې یادښت کې ویلي، چې دوی د فلسطین د دولت د پېژندلو لپاره د هر ډول یو اړخیز اقدام مخالفت کوي او ویلي یې دي، چې دا ډول اقدامات د اسراییل امنیت زیانمنوي او د امریکا د بهرني سیاست ګټو سره په ټکر کې دي.
د امریکا د بهرنیو چارو وزارت خبرداری ورکړی، هغه هېوادونه چې د اسراییل پر ضد ګام پورته کړي، ښایي د واشنګټن له لوري له دیپلوماتیکو عواقبو سره مخ شي.
د رویټرز د راپور له مخې، د امریکا له لورې په استول شوي پيغام کې لیکل شوي: ««موږ له حکومتونو غواړو، چې په دې په دې کنفرانس کې برخه وانخلي ځکه چې موږ دا په غزه کې د جګړې پای ته رسولو او د یرغمل شویو کسانو د خوشې کولو لپاره د حیاتي او روانو هڅو په وړاندې یو خنډ ګڼو.»
ټاکل شوې ده، چې د «دوو دولتونو حل لارې» کنفرانس د جون له ۱۷څخه تر ۲۰ پورې په نیویارک کې د ملګرو ملتونو په مرکزي دفتر کې د فرانسې او سعودي عربستان په کوربه توب ترسره شي.
د غونډې موخه د فلسطین دولت د جوړولو لپاره د چوکاټ طرح کول او له بلې خوا د اسراییل امنیت ته تضمین ورکول دي.
د فرانسې ولسمشر امانویل مکرون د وري میاشتې په ۲۵مه هیله څرګنده کړه، چې د فلسطین د دولت د رسمیت پېژندلو لپاره د خپل هېواد پرېکړه به نور هېوادونه هم ورته اقدام ته وهڅوي.
مکرون مخکې اعلان کړی و، چې ښايي فرانسه د ملګرو ملتونو د یادې غونډې په ترڅ کې د فلسطین دولت په رسمیت وپېژني.
مکرون د فلسطین د خپلواکې ادارې د مشر محمود عباس څخه غوښتي، چې حماس ګوښه کړي او په خپل حکومت کې اصلاحات پیل کړي.
خو اسراییل د دې کنفرانس له امله سخت اعتراض کړی او ویلي یې دي، چې دا غونډه د حماس لپاره یو ډول انعام ورکول دي او له فرانسې یې غوښتي، چې فلسطین دې په رسمیت نه پېژني.