د ایران دولتي رسنۍ: د نطنز د یورانیمو بډای کولو تاسیسات په نښه شوي دي

رید په یوه بیان کې وویل: «د اسراییل دغه اندېښمنوونکې پرېکړه چې پر ایران هوايي بریدونه وکړي، بې‌پروا تاوتریخوالی دی چې د سیمه‌ییز تاوتریخوالي د خورېدو ګواښ لا زیاتوي.»

هغه زیاته کړه: «زه له دواړو خواوو غواړم، چې ژر تر ژره ځانونه محدود کړي او له ولسمشر ټرمپ او زموږ نړۍوالو شریکانو څخه غوښتنه کوم، چې د دغه کړکېچ د نور کنټرول له لاسه وتلو څخه د مخنیوي لپاره ډېپلوماټیکو هڅو ته وده ورکړي.»

ښاغلي زامیر ټینګار وکړ: «موږ هغه ټکي ته رسېدلي یو چې بیرته ستنېدل ناشوني دي، موږ نور انتخاب نه لرو او باید فوري اقدام وکړو.» هغه دا اقدام د دفاع د ستراتیژۍ یوه مهمه برخه وبلله.

هغه په خپلو خبرو کې وویل: «تاریخ موږ ته ښيي چې کله زموږ د له منځه وړلو هڅې کېږي، باید خپل سر ټیټ نه کړو او د خپلې هستۍ د ژغورنې لپاره په جدي توګه جګړه وکړو. ازادي هغه څوک ترلاسه کوي چې د هغې لپاره چمتو وي مبارزه وکړي»

زامیر د اسراییل پوځ د ارادې او چمتوالي په اړه هم ټینګار وکړ او ویې ویل چې دغه اقدام د ملي امنیت د خوندي کولو په لړ کې مهم او ضروري و.

دغه څرګندونې په داسې حال کې کېږي چې سیمه‌ییز امنیتي وضعیت په تېزۍ بدلېږي او اسراییل د ایران د اتومي پروګرام په وړاندې خپل موقف کلک کړی دی.

د اسراییل د برید وروسته له تهران څخه د یو شمېر ودانيو خپاره شوي انځورونه ښيي چې د یوې ودانۍ یوه ټاکلې برخه د اسراییل د برید هدف وه.

یو اسراییلي چارواکي ویلي، د اسراییل د برید هدف د ایران د حکومت د پوځي او سیاسي چارواکو کورونه وو.

اسراييل وايي، چې عملیات يې پر مهمو سيمو کړي او خاص هدفونه یې په نښه کړي دي.

د ایران دولتي تلویزیون راپور ورکړی چې د اصفهان ولایت په نطنز ښار کې څو زورورې چاودنې اورېدل شوي دي.

نطنز هغه ځای دی چې د ایران د یورانیمو بډایه کولو یو له اساسي تاسیساتو کوربه دی.

ایران په دغه ښار کې دوه اتومي فابریکې لري؛ یو د ځمکې لاندې فابریکه چې د سوداګریزو اړتیاو لپاره جوړه شوې او ۵۰،۰۰۰ سنترفیوژونه پکې ځای پر ځای کېدای شي او بله کوچنۍ د ځمکې پر سر فابریکه چې د لوړ خالصوالي یورانیم تولیدوي.

شاوخوا ۱۴،۰۰۰ سنترفیوژونه د ځمکې لاندې فابریکه کې نصب شوي، له دې جملې نږدې ۱۱،۰۰۰ فعاله دي چې یورانیم تر ۵٪ خالصوالي پورې بډایه کوي.

په ځمکه پرته فابریکه کې بیا یورانیم تر ۶۰٪ خالصوالي پورې بډایه کېږي، چې د اتومي وسلو جوړولو له پولو سره نږدې ده.

دا چاودنې ښايي د نطنز د اتومي پروګرام پر امنیت جدي اغېزې ولري او د سیمې د کړکېچ کچه نوره هم لوړه کړي.

اعلامیه زیاتوي چې "د اسراییل هوايي ځواک ګڼ شمېر الوتکو وروستیو کې د عملیاتو لومړۍ څپه بشپړه کړه، چې په کې د ایران په مختلفو سیمو کې پر ګڼو پوځي اهدافو بریدونه شامل وو، چې اټومي مرکزونه هم په نښه شوي"

پوځي چارواکي له خلکو غوښتنه کوي چې د دفاعي ځواکونو د کورنۍ قوماندې د لارښوونو تابع پاتې شي، چې اړتیا سره سم به تازه معلومات ورکول کیږي او په ارام او مسوولانه توګه عمل وکړي.

په اعلامیه کې راغلي چې د دفاعي ځواکونو او اړوندو ادارو د احتمالي مختلفو حالتونو لپاره د دفاع او برید چمتووالی بشپړ دی.

اعلامیه کې راغلي: "د کلونو راهیسې د ایران رژیم د اسراییل پر وړاندې مستقیم او غیر مستقیم ترهګریز کمپاین پرمخ وړي، چې له لارې یې په منځني ختیځ کې د خپلو اجیرانو په مرسته ترهګریز فعالیتونه مالي او تخنیکي لارښوونه کوي او په ورته وخت کې د اټومي وسلې ترلاسه کولو په لور پرمختګ کوي."

په اعلامیه کې راغلي: "د ایران رژیم څرګنده کړې چې هدف یې د اسراییل له منځه وړل دي. د ایران لوړپوړو چارواکو په عامه توګه د اسراییل د ویجاړولو نیت څرګند کړی او له خپلو اجیرانو سره ګډ کار کوي. نن ورځ ایران د اټومي وسلې ترلاسه کولو ته تر هر وخت نږدې دی. د ایران په لاس کې د ویجاړونکو وسلو شتون د اسراییل د بقا لپاره وجودي ګواښ دی او په پراخه کچه نړۍ ته هم جدي ګواښ دی. اسراییل به هیڅکله داسې رژیم ته اجازه ورنه کړي چې هدف یې د اسراییل له منځه وړل وي، تر دې وسلو ورسوي."

اعلامیه زیاتوي چې "د دفاعي ځواکونو چمتووالی د جګړې په کرښه او په کور دننه بشپړ شوی دی. د اسراییل د اتباعو مقاومت به د دې کمپاین یوه مهمه برخه وي. دفاعي ځواکونه چمتو دي چې هر ډول اړتیا ته په ځواب کې خپل عملیات جاري وساتي. اسراییل د خپلو اتباعو د دفاع مسوولیت لري او هر ځای چې اړتیا وي خپل دفاعي اقدامات جاري ساتي، لکه څرنګه چې په تېرو وختونو کې یې کړي دي. دفاعي ځواکونه په دوامداره توګه د وضعیت ارزونه کوي او هر ډول پرمختګ به له خلکو سره شریک کړي."