د لوګر اوسېدونکي: «د څښاک پاکې اوبه ورځ تر بلې کمېږي»
د لوګر ولایت یو شمېر اوسېدونکي افغانستان انټرنشنل-پښتو ته وايي، چې د دغه ولایت په ځینو سیمو کې د څښاک پاکو اوبو کچه تر پخوا کمه شوې او ولس یې د نشتوالي له ګواښ سره مخ کړی دی.
د لوګر ولایت یو شمېر اوسېدونکي افغانستان انټرنشنل-پښتو ته وايي، چې د دغه ولایت په ځینو سیمو کې د څښاک پاکو اوبو کچه تر پخوا کمه شوې او ولس یې د نشتوالي له ګواښ سره مخ کړی دی.
هغوی سېشنبه (د غبرګولي ۲۷مه) په رالېږل شویو غږیزو پیغامونو کې ویلي، چې د څښاک پاکو اوبو کمېدو او د ځمکې تل ته ښکتهکېدو د لوګر د محمداغې ولسوالۍ اوسېدونکو په ګډون د دغه ولایت سلګونه کورنۍ له سختو ستونزو سره مخامخ کړي دي.
د لوګر ولایت د اوسېدونکو په وینا، په دغه ولایت کې د اوبو کچه پخوا ۴۵ متره وه؛ خو اوس ۱۸۰ مترو ته ښکته شوې ده.
د یاد ولایت یوه اوسېدونکي وویل: «خلک مجبور دي، چې له ډېر لرې واټن نه په لاس ګاډو، څارویو یا نورو نقلیه وسایطو کې اوبه راوړي.»
د لوګر ولایت اوسېدونکو له طالبانو او نړۍوالو بنسټونو نه د دې ستونزۍ د هوارۍ لپاره د مرستې غوښتنه کړې ده.
اقلیمي بدلون، د ورښتونو کمښت، د زېرمو د ناسم مدیریت استخراج او د یوه مسوول حکومت د نظارت نشتوالی د دې لامل شوی، چې د افغانستان یو شمېر ولایتونه د څښاک پاکو اوبو له کمښت سره مخامخ شي.
د یادونې ده، چې څه موده مخکې د ایران فرنټ پېج د نادولتي موسسې د یوه تازه راپور په حواله لیکلي و چې په کابل کې د اوبو زېرمې په تېرو ۱۰ کلونو کې د ښاري پراختیا او اقلیمي بدلونونو له امله تر ۳۰ مترو پورې راکمې شوې دي.
