د طالبانو د بهرنیو چارو وزارت د یوې خبرپاڼې په خپرولو سره ویلي چې د دې ډلې د بهرنیو چارو وزیر امیر خان متقي د ایران له بهرینو چارو وزیر عباس عراقچي سره په خبرو کې پر تهران د اسراییل بریدونه وغندل. د ایران بهرنیو چارو وزیر عباس عراقچي د اسراییل پرضد د طالبانو د دریځ ستاینه کړې.
د طالبانو د بهرنیو چارو وزارت نن د غبرګولي ۲۶مه د یوې خبرپاڼې په خپرولو سره لیکلي، چې ددې ډلې د بهرنیو چارو وزیر د ایران پر خاوره د اسراييل هوايي بریدونه، چې د نظامي مرکزونو ترڅنگ، عامه استوگنېزې سیمې هم پکې په نښه شوې، وغندل.
متقي دغه بریدونه له نړیوالو قوانینو سرغړونه او د ايران د ملي حاکميت نقض بللی.
متقي د ایران بهرنیو چارو وزیر ته ویلي چې په سعودي عربستان کې د پاتې ايراني حجاجو د خوندي لیږد په برخه کې همکارۍ ته چمتو دي.
د طالبانو بهرنیو چارو وزارت په خبرپاڼه کې د عباس عراقچي په حواله لیکلي چې د ایران د بهرنیو چارو وزیر سيد عباس عراقچي د ټيليفوني اړيکې د ستايلو ترڅنگ په خپلو خبرو کې پر ایران د اسراييل د بریدونو په اړه د طالبانو له دريځه مننه وکړه.
په خبرپاڼه کې راغلي چې عباس عراقچي افغانستان د یوه ملاتړي او خواخوږي هیواد په توګه د ایران یو ښه ګاونډی هیواد یاد کړی.
