د طالبانو د امر بالمعروف، نهې عن المنکر او شکایتونو اورېدو وزارت د خواله رسنیو کاروونکو ته یوه تازه خبرتیا خپره کړې، چې پکې یې د نوو بندیزونو تر څنګ ځینې محدودیتونه هم لګولي دي. دغه وزارت وایي، خواله رسنیو کې سپکاوی، یو بل ته ګواښ او د جعلي پاڼو جوړول د دوی قانون کې جرم دی.
د طالبانو د یاد وزارت ویاند سیف الاسلام خېبر په وینا؛ که هر څوک د دوی له دغو سپارښتنو سرغړونه وکړي، نو پر وړاندې به یې جدي او قانوني اقدامات وشي.
هغه زیاته کړې: «هېڅوک باید خواله رسنۍ په ناسم ډول ونه کاروي».
د نوموړي په خبره، خواله رسنۍ باید د کره معلوماتو، سوداګرۍ، زدهکړو او عامه پوهاوي لپاره وکارول شي.
طالبانو تر دې مخکې هم ورته بندیزونه او محدودیتونه لګولي وو. د دغې ډلې د استخباراتو ادارې تر څنګ د امربالمعروف وزارت د خواله رسنیو یو شمېر کارکوونکي شکنجه کړي او زنداني کړي هم دي.
طالبانو په دویم ځل واکمنۍ کې هم د بیان پر ازادۍ سخت بندیزونه لګولي او په خواله رسنیو یې هم ځانګړې څار ډلې جوړې کړې دي.
دغه ډلې مسوولیت لري، چې د طالبانو په خلاف هر ډول تبلیغاتو پر ضد فعالیتونه وکړي او هغه کسان هم په نښه کړي چې دوی ننګوي یا هم پرې نیوکې کوي.
