احمد ولي هوتک له درېیو کلونو وروسته د MMA سیالیو ته راستون شو
د افغانستان د ازاده سیالیو پېژندل شوی لوبغاړی احمد ولي هوتک به د (چنګاښ په ۶مه) له درېیو کلونو وروسته بېرته د لوبو ډګر ته راستون شي.
د افغانستان د ازاده سیالیو پېژندل شوی لوبغاړی احمد ولي هوتک به د (چنګاښ په ۶مه) له درېیو کلونو وروسته بېرته د لوبو ډګر ته راستون شي.
د ولي هوتک دغه سیالي به د بېلاروس په مېنسک ښار کې ترسره شي.
په دغې سیالۍ کې به ولي هوتک د روسیې له سایګید زیراکوف سره مخ شي. زیراکوف تر دې دمه د MMA څلور رسمي سیالۍ کړې، چې درې یې ګټلې دي او یوه یې بایللې ده.
خو ولي هوتک بیا ۱۱ سیالۍ ترسره کړې دي، چې له ډلې۱۰ بریاوې او یوازې یوه ماته لري.
طالبانو د روسیې د فوټبال ملي لوبډلې ته بلنه ور کړې، چې د یوې دوستانه لوبې لپاره کابل ته ورشي. ریا نووستي سپورټ رپوټ ورکړی، چې د طالبانو د صنعت او سوداګرۍ وزارت مرستیال احمدالله زاهد ویلي چې دوی ددې دوستانه سیالۍ معلومات د روسیې د فوټبال فدراسیون او د ورزش وزارت ته سپاري.
نوموړي زیاته کړې، « موږ به د خپلو هېوادونو ترمنځ د دوستانه سیالۍ د ترسره کېدو د نوښت په اړه معلومات د سپورت وزارت او د فوټبال فدراسیون ته وسپارو. موږ د دې احتمالي سیالۍ هرکلی کوو».
نوموړي ویلي، چې افغانستان ددې نظر ملاتړ کوي، چې لوبه په روسیه کې ترسره شي، خو زیاته کړې یې ده، چې « موږ ستاسې د راتګ هیله هم لرو او تاسې افغانستان ته رابولو».
د فوټبال نړیوال فدراسیون او د اروپا د فوټبال اتحادیې پر اوکراین د مسکو له برید راهیسې د روسیې ملي لوبډلې او کلبونه له نړیوالو سیالیو بند کړي دي.
روسیه یوازې دوستانه لوبې ترسره کوي، چې ډېری یې له کمزورو یا لږ پېژندل شویو لوبډلو سره دي.
روسیې د منځنۍ اسیا له یو شمېر هېوادونو سره هم سیالۍ کړې دي، خو دوه ځلې یې د منځنۍ اسیا د فوټبال اتحادیې د جام په سیالیو کې له ګډون انکار کړی، چې افغانستان هم پکې ګډون لري.
د افغانستان د فوټبال ملي لوبډلې د ۲۰۲۷ کال د اسیا جام غوراوي سیالیو په لړ کې بېګا د سوریې پر وړاندې ۰-۱ په توپیر ماتې وخوړه. په دغه سیالیو کې دا د افغانستان د فوټبال ملي لوبډلې پرلپسې دویمه ماته وه.
دغه لوبه بېګا شپه د کابل په وخت ۹:۴۵ د سعودي عربستان په کوربهتوب ترسره شوه.
د دغې لوبه لپاره د افغان لوبډلې په نوملړ کې د ویس عزیزي، نعیم رحیمي، محبوب حنفي، ارزو، شریف محمد، ذوالفقار نظري، امید پوپلزی، مازیار کوهیار، توفي سکندري، مصور احدي او د امید موسوي نومونه راغلي وو.
د افغانستان د فوټبال ملي لوبډلې د دغه سیالیو لومړۍ لوبه هم د ۰-۲ په توپیر د تاجکستان لوبډلې پر وړاندې ماتې خوړلې وه.
تمه کېږي، چې د افغانستان د فوټبال ملي لوبډله به په راتلونکې لوبه کې د پاکستان پر وړاندې د لوبو ډګر ته ښکته شي.
د مرکزي اسیا د فوټبال کنفدراسیون (CAFA) د شل کلنو ځوانانو اتلولۍ جام د پچې اچونې مراسم او د همغږۍ غونډه د تاجکستان په پلازمېنه دوشنبه ښار کې ترسره شوه او افغانستان به نن د کوربه هېواد پر وړاندې خپله لومړنۍ لوبه کوي.
د مرکزي اسیا د فوټبال کنفدراسیون د خپرې کړې خبرپاڼې له مخې؛ په دغې غونډه کې د لوبډلې ټولو لوبغاړو ته د سیالۍ قوانین وروپېژندل شول او همداراز د ګډون کوونکو لوبډلو رسمي جامې هم نندارې ته وړاندې شوې.
د افغانستان د ځوانانو ملي لوبډله په الف ګروپ کې د تاجکستان او قرغزستان له لوبډلو سره هم ډلې ده، چې د افغانستان لومړۍ لوبه به نن سې شنبه د کابل په وخت د شپې ۸:۳۰ بجې د کوربه هېواد تاجکستان پر وړاندې ترسره شي او همدارنګه به خپله دویمه لوبه د روانې میاشتې په ۱۲مه نېټه د کابل پر وخت ۴:۳۰ بجې د قرغزستان لوبډلې پر وړاندې ترسره کړي.
د مرکزي اسیا د شل کلنو ځوانانو د فوټبال په اتلولۍ جام کې د افغانستان سربېره تاجکستان، ایران، قرغزستان، ازبکستان او ترکمنستان ملي لوبډلې برخه اخلي، چې د تاجکستان هېواد په کوربهتوب ترسره کېږي.
د افغانستان د فوټبال ملي لوبډله د اسیا جام غوراوي لوبه کې نن شپه د سوریې لوبډلې پر وړاندې د لوبو ډګر ته ښکته کېږي. دغه لوبه نن شپه د کابل په وخت ۹:۴۵ د سعودي عربستان په کوربهتوب پیلېږي.
دا د اېټالیا د وینسنزو البرټو په مشرۍ د افغانستان د فوټبال ملي لوبډلې لومړۍ لوبه ده.
سوریه چې یوه بریا او درې امتیازه لري، د اسیا جام غوراوي سیالیو پنځم ګروپ په سر کې ده؛ خو افغانستان چې تر دې دمه یې هیڅ امتیاز نه دی ترلاسه کړی، د نوملړ درېیم ځایګی یې خپل کړی.
افغانستان تر دې وړاندې څلور ځلې له سوریې سره مخ شوی او ټولې څلور لوبې د سوریې په ګټه پای ته رسېدلې دي.
سوریې د افغانستان ملي لوبډلې پر وړاندې په تېرو دوو لوبو کې ۱۱ ګولونه وهلي دي.
د دغې لوبه لپاره د افغان لوبډلې پّ نوملړ کې د ویس عزیزي، کیوان متقیان، عیسی عزیزي، شریف محمد، محبوب حنیفي، سلیمان زرمتی، حبیبالله عسکر، مصور احدي، امید موسوي، رحمت اکبري، توفي سکندري، عبدالنجم حیدري، ذوالفقار نظري، عبدالرازق غفوري، پیمان سلطاني، امید پوپلزی، محمد نعیم رحیمي، قمرالدین، مازیار کوهیار، محمد وارث شیرزی، فرید سادات، یما شېرزاد، جمشید اڅکزی او حبیبالله هوتک نومونه راغلي دي.
د یوې معتبرې ورزشي رسنۍ د راپور له مخې، د امریکا د ولسمشر ډونالډ ټرمپ له لوري د ځینو هېوادونو پر وګړو د سفر بندیز له امله، د امریکا په میجر کرېکټ لیګ کې د افغان لوبغاړو ګډون له نامعلوم برخلیک سره مخ شوی. په دغه لیګ کې د لوبېدو لپاره اووه افغان لوبغاړو قراردادونه ترلاسه کړي دي.
د اې اېس پی اېن کرېک اېنفو د راپور له مخې، د امریکا د ولسمشر له فرمان وروسته، د امریکا د میجر کرېکټ لیګ چارواکي هېله من دي، چې افغان لوبغاړي به اغیزمن نه شي او سږکال به په دغه لیګ کې ولوبیږي.
امریکا ته د سفر بندیز په دغه فرمان کې د افغانستان په ګډون ۱۲ هېوادونه شامل دی.
د امریکا د کرېکت لیګ یوه چارواکي ویلي، چې دوی هیله لري، چې دا لیګ به د امریکا د بهرنیو چارو وزیر له لوري د «ستر ورزشي ایونټ» په توګه و پېژندل شي، تر څو افغان لوبغاړي له دې بندیز نه اغېزمن نه شي.
د امریکا میجر کرېکټ لیګ ویاند وايي:« موږ له اړوندو چارواکو سره کار کوو، تر څو د نړیوالو لوبغاړو سفر له خنډ پرته ترسره شي. دا لیګ لا هم د نړۍ غوره کرېکټ لوبغاړي راجذبوي او سږکال به زموږ ټر ټولو زړه راښکونکی فصل وي.»
همدا راز د امریکا د کرېکټ لیګ د ځینو لوبډلو چارواکو کرېک اېنفو ته ویلي هڅه کوي، چې افغان لوبغاړي له بندیز مخکې امریکا ته راولي او دا موضوع یې د امریکا میجر کرېکټ لیګ له مشرانو سره شریکه کړې ده.
د امریکا د بهرنیو چارو وزیر ویلي، چې ولسمشر ټرمپ له خوا امریکا ته د سفر بندیز په تازه اجراییوي فرمان کې استثنا هم شامله ده. هغه زیاتوي: «هغه لوبغاړيي یا لوبډلې چې د نړیوال جام، المپیک یا بل کوم ستر ورزشي پروګرام لپاره سفر کوي د بندیز نه مستثنا دي.»
دمګړی راشد خان، عظمت الله عمرزی، نوین الحق، ګلبدین نایب، فضل الحق فاروقي، وقار سلام خیل او نور احمد د ۲۰۲۵ کال لپاره د امریکا میجر کرېکت لیګ سره قراردادونه لري.
د امریکا میجر کرېکټ لیګ د جون په ۱۲ پیلیږي.