د ملا عبدالغني برادر په مشرۍ اقتصادي غونډه کې د طالبانو اقتصادي پالیسي تایید شوه
د طالبانو د رييس الوزراء د اقتصادي مرستیال ملا عبدالغني برادر په مشرۍ نن په اقتصادي نوبتي غونډه کې د طالبانو اقتصادي پالیسي تر هر اړخیزو خبرو وروسته تایید شوه.
د اقتصادي معاونیت د خبرپاڼې له مخې، دغه اقتصادي پالیسي به د هېواد د اقتصادي فعالیتونو په همغږي کولو، له سرچینو د غوره ګټې اخیستنې او د خصوصي سکټور د ملاتړ په برخه کې مهم رول ولري.
د یادې پالیسۍ لیدلوری "پر اسلامي اقتصادي نظام ولاړ پرمختللی او سوکاله افغانستان" او موخې یې "د پانګونې د جذب او پراختیا لپاره د مناسب چاپېریال رامنځته کول، د کورنیو تولیداتو او صادراتو زیاتول، د اشتغال کچې لوړول او د بېوزلۍ کمول، پایداره اقتصادي پراختیا او وده، د اقتصادي ثبات، سوکالي او اسلامي ټولنیز عدالت ټینګښت" دي.
له دې سره سم، په غونډه کې مالیې وزارت ته سپارښتنه وشوه چې د بغلان ولایت د مرکز پلخمري اړوند ۱۳ کلیو ته د برېښنا شبکې غځولو پروژې ته په ۱۴۰۴ مالي کال کې د اړتیا وړ بودیجه ځانګړې او د افغانستان برېښنا شرکت یاده پروژه تطبیق کړي.