د زلالې هاشمي خپلوانو افغانستان انټرنشنل ته وویل چې طالبانو پر دوی فشار راوړی څو ووايي، چې افغانه سندرغاړې زلاله هاشمي تښتول شوې نه ده، بلکې له کوره خپله تښتېدلې ده. دوی همدراز نیوکه کوي، چې د طالبانو اداره ورسره د زلالې هاشمي په راپېدا کولو کې هېڅ راز مرسته نه کوي.
د افغان سندرغاړې زلالې هاشمي د کورنیو غړو نن شنبه د چنګاښ پر لومړۍ نېټه افغانستان انټرنشنل ته وویل چې دوی په عریضه کې لیکلي، چې زلاله هاشمي تښتول شوې ده خو د طالبانو امنیتي مسوولینو ورته ویلي چې تاسې به په عریضه کې د هغې لپاره «فرار از منزل» لیکئ.
د زلالې هاشمي د کورنۍ یوه غړي وویل:«په لومړیو ورځو کې مو د طالبانو کورنیو چارو وزارت او اوولسمې حوزې ته مراجعه وکړه خو تر دې دمه بیا دوی موږ ته کوم احوال نه دی راکړی خو دوی د پیدا کولو پرځای فشار اچوي چې موږ ومنو هغه له کوره په خپله خوښه وتلې ده.»
د مېرمن زلالې کورنۍ نیوکه کوي چې طالب مسوولینو ورته ویلي چې دا موضوع باید رسنیزه نه شي او تاسې له هېواده بهر رسنیو سره خبرې مه کوئ.
د افغان سندرغاړې زلالې هاشمي کورنۍ غړو هغه ویډیو جعلي وبلله، چې په وروستیو ورځو کې په ټولنیزو رسنیو کې خپره شوې او ادعا شوې چې په دې کې زلاله هاشمي له کوره د وتلو پرمهال لیدل کېږي.
د کورنۍ یوه بل غړي یې افغانستان انټرنشنل ته وویل:«که چېرې زلاله هاشمي له کوره پخپله وتلې وای نو هغې به خپل موبایل او پاسپورټ هم له ځان سره درلود او خپل څلور کلن زوی به یې هم له ځان سره وړی و.»
دوی همدراز د افغان سندرغاړې زلاله هاشمي د پاسپورټ او د الکترونیکي تذکرې یوه کاپي له افغانستان انټرنشنل سره شریکه کړې ده.
د افغانې سندرغاړې زلاله هاشمي خاوند سید محسن هاشمي افغانستان انټرنشنل ـ پښتو ته د پنجشنبې په ورځ (د غبرګولي ۲۹مه) په یوه لېږلې ویډيو کې ویلي، چې زلاله هاشمي ۱۵ ورځې وړاندي په کابل کې تښتول شوې.
هاشمي ویلي، چې تر اوسه د هغې د ژوند او مرګ په اړه معلومات نشته او د پیدا کېدو ټولې هڅې يې ناکامه شوي دي.
د طالبانو د کابل امنیه قوماندانۍ ویاند هم په خپل اېکسپاڼه کې ویلي و، چې مېرمن زلاله په خپله خوښه خپل کور پرېښی او تښتول شوې نه ده.
زلاله یو ۴ کلن زوی لري، چې کورنۍ يې وایي روغتیايي حالت يې ښه نه دی.
"زلاله هاشمي" په افغانستان کې د "طلوع" خصوصي ټلویزیون د "افغان ستوري" په سندريز پروګرام کې د ګډون او وروستي پړاو ته د رسېدو له امله مشهوره وه.
