امریکایي چارواکی: له قطر پرته د ایران له لوري بل هېڅ امریکایي پوځي اډه نه ده په نښه شوې

د اسراییلي رسنیو د راپور له مخې، دا ناسته داسې مهال ترسره کېږي چې ایران د غچ اخیستنې په توګه د قطر او عراق په خاوره کې پر امریکايي پوځي اډو بریدونه پیل کړي دي.

د امنیتي چارو یوه وزیر ویلي، چې دا غونډه به د مهمو پرېکړو لپاره زمینه برابره کړي او د سیمه‌ییز وضعیت د لا خرابېدو په وړاندې به د اسراییل د پوځي او سیاسي تګلارې لپاره نوې ارزونې وشي.

له دې وړاندې، قطر او بحرین هم خپل فضایي حدود د ورته امنیتي اندېښنو له امله تړلي و.

دغه اقدامات وروسته له هغه ترسره شول، چې ایران په دوحه کې د امریکا د العدید پوځي اډې پر هدف توغندي وتوغول.

په خلیج کې د امریکا څو مهمې پوځي اډې شتون لري، چې د سیمه‌ییز امنیت او نړۍوالو اړیکو په ډګر کې مهم رول لري.

د ایران سپاه پاسداران تایید کړې، چې د قطر العدید امریکایي پوځي اډه یې د «بشارت فتح» په نوم عملیاتو کې په "ویجاړونکو او پیاوړو" توغندیو ویشتلې ده.

دا اقدام د امریکا له لوري د ایران پر اټومي تاسیساتو د برید په غبرګون کې ترسره شوی.

په هغه اعلامیه کې چې د سپاه پاسداران له خوا خپره شوې راغلي: «د ایران وسله‌وال ځواکونه به هېڅکله د خپلې خاورې، ملي حاکمیت او امنیت پر وړاندې هر ډول تعرض بې ځوابه پرېنږدي.»

اعلامیه زیاتوي، چې دغه عملیات د ایران د ملي امنیت شورا په مشوره او د "خاتم‌الانبیاء" مرکزي قرارګاه تر قومندې لاندې ترسره شوي.

د اعلامیې په یوه برخه کې راغلي: «په سیمه کې د امریکا پوځي اډې او اهداف نور د قوت نښې نه، بلکې د دې هېواد د ستراتیژیکو کمزوریو سترګې بلل کېږي.»

د دغه بریدونو هدف العدید پوځي اډه ده، چې د امریکایي ځواکونو د هوايي قوماندې مرکز او د امریکا د تر ټولو مهمو ستراتیژیکو تاسیساتو له ډلې شمېرل کېږي.

قطر دا مهال د امریکا له مهمو سیمه‌ییزو نظامي متحدینو څخه ګڼل کېږي.

ایراني چارواکو ټینګار کړی، چې دا برید د محرم میاشتې د پیل له درناوي سره سم د امام حسین (ع) په نوم د "یا اباعبدالله الحسین" کوډ تر چتر لاندې ترسره شو.

سپاه پاسداران وایي، دا بریدونه یوازې د انتقام پیل دی او که امریکا یا اسراییل بله تعرضي هڅه وکړي، نو لا پراخ او سخت پوځي غبرګون به وویني.

دا اقدام وروسته له هغه وشو، چې قطر هم خپل هوايي حریم لنډمهاله بند کړ.

راپورونه ښيي، ایران د امریکا پر نظامي اډو چې په قطر او عراق کې دي، لس توغندي توغولي دي.

د سیمې امنیتي حالت خراب شوی او پروازونه اړ شوي، چې خپل مسیر بدل یا ځینې یې لغوه کړي. چارواکي وایي، دا بندیزونه به تر هغه وي، څو وضعیت بېرته عادي شي.

د راپورونو له مخې، په قطر کې د دوحې ښار پر فضا کې څو چاودنې اورېدل شوې او یو توغندی د امریکا یوې اډې ته رسېدلی دی.

همداراز، یو بل توغندی د عراق په یوه اډه لګېدلی دی.

تر اوسه د بریدونو له امله د تلفاتو یا زیانونو کره معلومات نه دي ورکړل شوي.

ایران دا اقدام د امریکا د هغو بریدونو پر وړاندې کړی، چې د شنبې په ورځ د ایران پر اټومي مرکزونو ترسره شول.