سېد روح الله موسوي د اسیا د اتلولۍ سیالیو د سرو زرو مډال وګاټه
د افغانستان د موی ټای ملي لوبغاړي "سید روح الله موسوي" په تاریخ کې د لومړي ځل لپاره د اسیا له موی ټای سیالیو د سرو زرو مډال وګاټه.
د افغانستان د موی ټای ملي لوبغاړي "سید روح الله موسوي" په تاریخ کې د لومړي ځل لپاره د اسیا له موی ټای سیالیو د سرو زرو مډال وګاټه.
د مسوولینو په وینا، د دغو سیالیو پایلوبه نن د سېد روح الله موسوي او ټایلنډي سیال تر منځ د ویتنام په کوربتوب پیل شوه او بالاخره ښاغلي موسوي خپل سیال په ګونډو کړ او ورسره یې د یادو سیالیو د سرو زرو مډال خپل کړ او په خپل وزن یعنې ۶۰ کیلوګرامه کې یې اتلولي هم خپله کړه.
ښاغلي موسوي تر دې مخکې خپل فلیپيني او ویتنامي سیالانو ته هم ماتې ورکړې وه او پایلوبه د داسې یوه هېواد له لوبغاړي سره وه، چې په نړۍ کې د موی ټای لوبې سرچینه بلل کېږي.
روح الله موسوي تر دې مخکې په ۲۰۲۳ کال کې د ټایلنډ په "بانکوک" کې په ورته سیالیو کې د سپینو زرو، په ۲۰۲۲ کال کې د ژېړو مډال او په ۲۰۱۶ کال کې هم د ژېړو مډال ګټلی وو.
د اسیا د اتلولۍ سیالۍ ۶ ورځې مخکې د ویتنام په "تاینکوین" په کوربتوب د ۴۰ هېوادونو د لوبغاړو په ګډون سره پیل شوې وه او نن پای ته ورسېده.
پخواني ولسمشر حامد کرزي په یادو سیالیو کې د سېد روح الله موسوي د بریا له امله هغه او ټولو هېوادوالو ته مبارکي ویلې ده.