د ملګرو ملتونو د نشه يي توکو او جرمونو ضد ادارې په خپل راپور کې ویلي، چې په افغانستان کې له ۲۷زرو ډیر کسان له لوړ خطر لرونکو نشه يي توکو استفاده کوي او د هیروینو او کریسټال استعمال ډېر شوی.
د دغې ادارې ارزونې ښيي چې په دې ډله کې ۲۶۷۰ ښځې او ۲۱۵۰ ماشومان شامل دي.
په راپور کې ویل شوي، چې په افغانستان کې د چرسو او تریاکو دودیز استعمال کم شوی، خو پر ځای یې د هیرویین او کریسټال کارونه ډېره شوې ده.
د ملګرو ملتونو د نشه يي توکو او جرمونو ضد ادارې په دغه راپور کې ویلي، چې د ستن له لارې د نشه يي توکو مصرف اندېښموونکی دی.
د یادې ادارې د سروې له ګډونوالو شاوخوا ۸ سلنه کسانو ویلي، چې کله نا کله یې نشه يي توکي تزریق کړي او له ۷۵ سلنه زیاتو یې خپلو منځونو کې ستنې شریکې کړې دي.
د ملګرو ملتونو د نشه يي توکو او جرمونو ضد د سیمه ییز دفتر استازي اولیور شټولپ ویلي:« درملنې ته لاس رسی لا هم یو لوی خنډ دی، په ځانګړې توګه په کلیوالو سیمو کې. ښځې او ځوانان تر ټولو زیات له درملنې بې برخې پاتې شوي.»
پر همدغه مهال د طالبانو د کورنیو چارو وزارت ویاند عبدالمتین قانع ویلي، چې له نشه يي توکو سره د مبارزې په برخه کې له طالبانو سره هېڅ ډول همکاري نه ده شوې.
