د پنځم پرله پسې کال لپاره؛ افغانستان یوځل بیا د پاسپورټ نړیوالې درجه بندۍ په پای کې راغلی

سینګاپور یو ځل بیا د ۲۰۲۵ کال د هینلي پاسپورت درجه بندۍ په سر او افغانستان په پای کې راغلی. د سینګارپور وګړو ته د نړۍ ۱۹۳ هېوادونو ته بې ویزې یا د رسېدو پرمهال ویزې د سفر اجازه ورکول کېږي. امریکا، چې یو وخت د نړۍ تر ټولو پیاوړی پاسپورټ درلود، اوس لسم مقام ته ښکته شوې.

دغه کلنۍ اعتبارکچه، چې د هینلي او پارټنرز په نامه د تابعیت او استوګنې مشورتي ادارې له خوا هرکال خپریږي، پاسپورتونه د هغو هېوادونو شمېر ته په کتو ارزوي چې اتباع یې کولی شي له ویزې پرته سفر وکړي.

اروپایي هېوادونه لا هم په سر کې

اتریش، بلجیم، لوګزامبورګ، هالنډ، ناروې، پرتګال، او سویډن د ۱۸۸هېوادونو د ویزې اسانتیا سره څلورم ځای لري.

بریتانیا، چې مخکې یې خپل امتیاز له لاسه ورکړی و، اوس له نوي زیلانډ او سویس سره په شپږم مقام کې ده او اتباع یې ۱۸۶هېوادونو ته تګ کولی شي. استرالیا په اووم، او کاناډا، مالتا، پولنډ، هنګري، چک او متحده عرب امارات په اتم مقام کې دي.

د امریکا متحد ایالتونه، چې یو وخت د نړۍ تر ټولو پیاوړی پاسپورت درلود، اوس لسم مقام ته ښکته شوی او یوازې ۱۸۲هېوادونو ته یې اتباع پرته له ویزې سفر کولی شي.سعودي عربستان په ۵۹ ځای کې دی.

د پاسپورتونو په پای کې افغانستان بیا هم د پنځم کال لپاره تر ټولو وروستی ځای لري، چې وګړي یې یوازې ۲۵هېوادونو ته پرته له مخکې ویزې سفر کولی شي. له دې وروسته سوریه، عراق، پاکستان او یمن راځي ، چې له افغانستان نه یوڅه مخکې دي. پاکستان پر سلم مقام دی، سوریه پر ۱۰۲ او عراق په ۱۰۱ مقام کې دی.

بل‌خوا، متحده عرب امارات چې د ویزو د ډیپلوماسۍ له لارې ډېر پرمختګ کړی، اوس د ۱۸۴هېوادونو له لاسرسي سره اتم مقام لري. چین، سره له دې چې دویم لوی اقتصاد لري، لا هم یوازې ۸۳هېوادونو ته بې ویزې سفر کولی شي، چې دا یې ۶۴ مقام جوړوي.

د هینلي او پارټنرز مشر کریستیان کیلن وایي، « دغه درجه بندي ښيي چې کوم هېوادونه د نرم ځواک او ډیپلوماټیکو اړیکو له لارې د خپلو اتباعو لپاره د نړۍ دروازې پرانیزي».