د ایکو (اقتصادي همکارۍ سازمان) د ۱۷مې سرمشریزې غونډه نن جمعه (د چنګاښ ۱۳مه) په اذربایجان کې پیل شوه. د طالبانو د ریاست الوزرا اقتصادي مرستیال ملا عبدالغني برادر هم د یوه پلاوي په مشرۍ په دغه سرمشریزه کې ګډون کړی دی.
د طالبانو د ریاستالوزراء اقتصادي معاونیت پر اېکس پاڼه کاږلي، چې ملا عبدالغني برادر په دغه سرمشریزه کې د ګډون او وینا په موخه د غونډې عمومي تالار ته رسېدلی او د اذربایجان هېواد د ولسمشر له لوري یې هرکلی هم شوی دی.
په دغې سرمشریزه کې د ګڼو هېوادونو مشرانو او استازو ګدون کړی دی.
د طالبانو د ریاست الوزرا اقتصادي معاونیت ویلي، چې ملا عبدالغني برادر د اقتصادي همکاریو سازمان په ۱۷مه سرمشریزه کې د ازبکستان له ولسمشر شوکت میرضیایوف څخه په افغانستان کې د اوسپنې پټلۍ جوړېدو پروژه کې د پانګونې غوښتنه کړې ده.
د طالبانو په خبرپاڼه کې ویل شوي، چې ملا برادر د اقتصادي همکاریو سازمان (ایکو) په سر مشریزه کې د ازبکستان د ولسمشر شوکت میرضیایوف سره د لېدنې پرمهال په افغانستان کې د اوسڼبې پتلۍ د جوړېدو په اړه خبرې کړي دي. ملا برادر د ازبکستان له ولسمشر څخه غوښتنه کړې چې د افغانستان د اوسپنې پټلۍ پروژه کې پانګونه وکړي.
طالبانو ویلي، چې د سیمې یو شمېر هېوادونو د دغې پروژې په پلي کولو کې لېوالتیا ښودلې او تمه کیږي چې ملا برادر به د ایکو سازمان په څنډه کې د ځینو نورو هېوادونو له مشرانو سره هم د یادې پروژې په اړه خبرې وکړي.
د اوسپنې پټلۍ دغه پروژه په مزارشریف کې د ازبکستان له اوسپنې پټلۍ څخه پیلیږي تر هراته رسیږي او له هرات څخه کندهار ته او له کندهار څخه د پاکستان د اوسپنې پټلۍ شبکې سره نښول کیږي.
د یادې پروژه په وسیله به روسیه او منځنۍ اسیا د سویلي اسیا له هېوادونو سره ونښلي او دا به د مسکو او نوې ډیلي ترمنځ د نورو لارو په پرتله ډېره لنډه وي.
طالبانو ویلي، چې د دې پروژې په عملي کېدو سره به افغانستان د روسیې، منځنۍ اسیا، اروپا او سویلي اسیا بازارونو ته لاره پیدا کړي او د ایران چابهار او بندر عباس ته به هم لاسرسی اسانه شي.
دغه پروژه چې ۱۴۶۸ کیلومتره اوږدوالی لري د افغانستان له نهو ولایتونو څخه تیریږي او طالبانو ویلي، چې د ایکو په څېر سازمانونه او اقتصادي ناستي د یادې پروژې په عملي کېدو کې د هېوادونو د پاملرنې لپاره ښه فرصت بلل کیږي.
د ایران د کورنیو چارو وزارت امنیتي مرستیال علياکبر پورجمشیدیان ویلي، د هغو بهرنیو وګړو حضور چې قانوني اسناد لري هېڅ ډول ستونزه نه لري؛ خو بېاسناده کډوال به د درناوي او عزت په فضا کې بېرته خپلو هېوادونو ته ستانه شي.
د اېراف خبري اژانس د راپور له مخې؛ پورجمشیدیان څرګنده کړه: «هغه بهرني وګړي، چې قانوني اسناد لري د دوی حضور په هېواد کې کومه ستونزه نه پېښوي.»
نوموړي زیاته کړه: «بېاسناده وګړي هم زموږ ګران ورونه دي، زموږ ګاونډیان دي، زموږ همدینه او موږ ټولو ته درناوی لرو؛ خو د دې لپاره چې زموږ هېواد ځانګړي شرایط لري او زموږ ظرفيتونه محدود دي، دا اړینه ده چې دوی د درناوي او عزت سره د بهرنیانو چارو د مرکز له لوري په ترتیب سره بېرته خپلو هېوادونو ته ولېږل شي».
دغه ایراني چارواکي په ټینګار سره ویلي، هېواد یې دومره ظرفیتونه نه لري چې د ټولو بېاسناده کډوالو اړتیاوې پوره کړي.
د هغه په وینا؛ هېواد به یې د ښه ګاونډي او درناوي په فضا کې بېاسناده کډوال وباسي.
دغه چارواکي داسې مهال دا څرګندونې کوي، چې له تېرو دوو اونیو راهیسې په ایران کې افغان کډوال له سختو ځورونو، شکنجو، زنداني کېدو او نیونو سره مخ دي.
په ایران کې افغان کډوال نیوکې کوي، چې ایراني پولیس او وګړي ورسره غیرانساني چلند کوي.
طالبانو خبر ورکړی، چې په تېرو دوو اونیو کې له یاد هېواد څخه د کډوالو د اېستلو بهیر په بې سارې توګه چټک شوی او هره ورځ د ۲۰زره کسانو به شاوخوا کې کډوال په جبري توګه له ایران څخه افغانستان ته ستنېږي.
د ایران او اسراییل ترمنځ د کړکېچ پر مهال د افغانانو پر ضد د اېستل کېدو بهیر چټک شوی او ان یاد هېواد ځینې افغانان «اسراییل ته د جاسوسۍ» په تور ونیول.
د لغمان ولایت په مرکز مهترلام ښار کې د طالبانو امر بالمعروف او نهی عن المنکر محتسبین له څو ورځو راپدېخوا د ښار په لارو، کوڅو او مارکیټونو کې ځوانان دروي او د هغوی موبایلونه پلټي، چې ډیرې ښاریان دا چاره د دوی په شخصي حریم تېري بولي.
سیمهییز اوسېدونکي وایي چې یاد محتسبین د ځوانانو له اجازې پرته د دوی شخصي معلومات، عکسونه، ټولنیزې شبکې او پیغامونه ګوري.
ګل اغا چې د لغمان ولایت مرکز اوسېدونکی دی او د امر بالمعروف له خوا یې څو ورځې وړاندې ګرځنده ځیرک ټلیفون پلټل شوی، افغانستان انټرنشنل پښتو ته وویل: « زه پوهېږم چې اسلامي اصول باید مراعات شي، خو دا ډول چلند د دین بدنامي ده. څو ورځې وړاندې یې زما خپل موبایل پلټلی و، احساس مې وکړ چې نور زه آزاد نه یم، شرمېدم چې ان مسیجونه مې هم ګوري.»
د یاد ولایت یو بل تن ځوان د نوم نه ښودلو په شرط افغانستان انټرنشنل پښتو ته د طالبانو امر بالمعروف د محتسبینو د یاد عمل په اړه وایي: « مونږ تېره ورځ په عصمت څلورلارې کې وو، د بالمعروف والا (امر بالمعروف محتسبین) راغلل، زما د ملګري موبایل یې واخیست، انټرنټ یې خلاص کړ، ټولنیزې شبکې یې وکتلې، عکسونه یې وپلټل. دا کار ډېر سپکاوی و؛ موږ خو ترهګر نه یو».
بلخوا یو شمېر دیني عالمان د طالبانو دا چاره د خلکو په شخصي حریم تېری او د شرعیت خلاف بولي، دیني عالم عبدالواسع چیشتي په اسلام کې د یادې چارې د حراموالي او تاوان په اړه افغانستان انټرنشنل پښتو ته وویل: «زه د اسلام خدمت غواړم، خو دا چاره که د خلکو باور له لاسه ورکړي، بیا نه دین پاتیږي نه اطاعت. د خلکو له محرمیت سره لوبې کول شرعي، اخلاقي او قانوني مشروعیت نه لري.»
حقوقي څېړونکي بیا وايي چې دا ډول سخت چلندونه نه یوازې د ولس شخصي ازادۍ تر پښو لاندې کوي، بلکې د طالبانو او ولس تر منځ د بې باورۍ فضا نوره هم پراخوي.
حقوقي څېړونکی سلام مفکر وايي: « کله چې حاکمان د ولس پر ژوند، فکر، جامو، موبایل او خبرو واک غواړي، هلته نور مشروعیت له منځه ځي.»
د لغمان ولایت سیمهییزو طالب چارواکو لا تر اوسه په رسمي ډول په دې اړه څه نهدي ویلي، خو د طالبانو د تېر دریځ له مخې، دا ډول اقدامات د فحشا، غیر اسلامي محتوا او بهرني فرهنګ د نفوذ د مخنیوي په موخه ترسره کېږي.
د روسیې ولسمشر ولادیمیر پوتین د امریکا له ولسمشر ډونلډ ټرمپ سره ټیلیفوني خبرو کې ویلي، چې روسیه به په اوکراین کې د جګړې موخې تعقیب کړي او له هغو نه شاته کېږي.
د کرملین سلاکار یوري اوشاکوف ویلي، دواړو مشرانو د اوکراین جګړې او د منځني ختیځ وضعیت په اړه خبرې کړي، او ټرمپ یو ځل بیا پر اوربند ټینګار کړی دی.
پوتین ویلي چې روسیه د شخړې سیاسي حل غواړي، خو د شته وضعیت د اساسي لاملونو پر ضد به خپل دریځ نه پرېږدي.
دغه خبرې په داسې حال کې شوي چې روسیې په تازه بریدونو کې د اوکراین زیربناوې بمبار کړيچې ملګي وګړو ته پکې هم مرګ ژوبله اوښتې.
ټرمپ خبریالانو ته ویلي، چې له پوتین سره د جګړې د پای ته رسولو په اړه یې هیڅ پرمختګ نه دی کړی.
د ترکمنستان بهرنیو چارو وزارت په یوه خبرپاڼه کې ویلي، چې د دوی بهرنیو چارو وزیر رشید مرادوف د ملابرادر سره په لیدنه کې پر سیاسي، سوداګریزو او ډېپلوماټیکو همکاریو خبرې کړي. طالبانو په دې لیدنه کې د انرژۍ، ترانسپورټ او مخابراتو په برخه کې د پاملرنې غوښتنه کړې.
د ترکمنستان بهرنیو چارو وزارت د پنجشنبه په ورځ (د چنګاښ ۱۲مه) په یوه خبرپاڼه کې ویلي، چې د دوی وزير رشید مرادوف په مشرۍ يو پلاوي د طالبانو د اقتصادي مرستيال ملا برادر سره لیدنه کړې.
دغه لیدنه په اذربایجان کې د ایکو سازمان د غونډې په څنډه کې تر سره شوې.
په خبرپاڼه کې ویل شوي، چې په دې ناسته کې دواړو خواوو د سیاسي، ډېپلوماټیکو، سوداګریزو او اقتصادي همکاريو او پر اوسنيو موضوعاتو بحث کړی.
په دې ناسته کې د ترکمنستان-افغانستان-پاکستان- هند د ټاپي پروژې د ګازو د نل لیکي، د برېښنا د لېږد او د فایبر مخابراتي شبکې پر جوړولو هم خبرې شوي.
ملا برادر د اذربایجان حکومت په رسمې بلنه د ایکو سازمان غونډې ته بلل شوی.
د ایکو سازمان غونډه نن او سبا د اذربایجان په پوزولي ښار کې ترسره کیږي. ملا برادر له غونډې یوه ورځ وړاندې د اذربایجان له لومړي وزیر سره په لېدنه کې په باکو کې د طالبانو د سفیر منلو غوښتنه هم کړې وه.