امریکا خپلو وګړو ته خبرداری ورکړی، چې د خپلسرو نیونو د ګواښ له امله ایران ته سفر ونه کړي
د امریکا د بهرنیو چارو وزارت ویاندې ټامي بروس امریکایي وګړو ته خبرداری ورکړی، چې د خپلسرو نیونو د ګواښ له امله دې ایران ته له سفر کولو ډډه وکړي.
د امریکا د بهرنیو چارو وزارت ویاندې ټامي بروس امریکایي وګړو ته خبرداری ورکړی، چې د خپلسرو نیونو د ګواښ له امله دې ایران ته له سفر کولو ډډه وکړي.
هغې وویل: «موږ له ډېرې مودې راهیسې امریکایي وګړو ته خبرداری ورکړی، چې ایران ته سفر ونه کړي او دغه ګواښ اوس تر بل هر وخت زیات شوی.»
چارواکو ویلي، روسیې د شپې ناوخته پر اوکراین د توغندیو او بېپیلوټه الوتکو پراخه بریدونه کړي، چې په ترڅ کې یې د پلازمېنې کییف یوه هستوګنیزه ودانۍ ویشتل شوې، ددغه بریدونو له امله تر اوسه د مرګ ژوبلې جزیات ندي خپاره شوي.
د کېیف انډپېنډينټ خبري شبکې خبریالانو راپور ورکړی، چې د شپې شاوخوا ۱۰ بجې (د سیمهييز وخت له مخې) په پلازمېنه کې د څو پرلهپسې چاودنو غږونه اورېدل شوي، او دغه بریدونه د جولای تر څلورمې سهاره پورې دوام درلود.
د اوکراین هوايي ځواک تایید کړې چې روسیې شاوخوا ۱۲:۳۰ بجه د شپې کییف ته یو بالستیک میزایل توغولی، او ورپسې یې نږدې ۲:۳۰ بجې نور بریدونه هم ترسره کړي.
د کییف ښاروال ویټالي کلیچکو په وینا، برید درنه مرګژوبله یا پراخ تاوان نه لري، خو زیاته کړې یې ده چې د پېښې بشپړې جزيیات لا هم تر تایید لاندې دي.
د روسیې ولسمشر ولادیمیر پوتین د امریکا له ولسمشر ډونلډ ټرمپ سره ټیلیفوني خبرو کې ویلي، چې روسیه به په اوکراین کې د جګړې موخې تعقیب کړي او له هغو نه شاته کېږي.
د کرملین سلاکار یوري اوشاکوف ویلي، دواړو مشرانو د اوکراین جګړې او د منځني ختیځ وضعیت په اړه خبرې کړي، او ټرمپ یو ځل بیا پر اوربند ټینګار کړی دی.
پوتین ویلي چې روسیه د شخړې سیاسي حل غواړي، خو د شته وضعیت د اساسي لاملونو پر ضد به خپل دریځ نه پرېږدي.
دغه خبرې په داسې حال کې شوي چې روسیې په تازه بریدونو کې د اوکراین زیربناوې بمبار کړيچې ملګي وګړو ته پکې هم مرګ ژوبله اوښتې.
ټرمپ خبریالانو ته ویلي، چې له پوتین سره د جګړې د پای ته رسولو په اړه یې هیڅ پرمختګ نه دی کړی.
د ترکمنستان بهرنیو چارو وزارت په یوه خبرپاڼه کې ویلي، چې د دوی بهرنیو چارو وزیر رشید مرادوف د ملابرادر سره په لیدنه کې پر سیاسي، سوداګریزو او ډېپلوماټیکو همکاریو خبرې کړي. طالبانو په دې لیدنه کې د انرژۍ، ترانسپورټ او مخابراتو په برخه کې د پاملرنې غوښتنه کړې.
د ترکمنستان بهرنیو چارو وزارت د پنجشنبه په ورځ (د چنګاښ ۱۲مه) په یوه خبرپاڼه کې ویلي، چې د دوی وزير رشید مرادوف په مشرۍ يو پلاوي د طالبانو د اقتصادي مرستيال ملا برادر سره لیدنه کړې.
دغه لیدنه په اذربایجان کې د ایکو سازمان د غونډې په څنډه کې تر سره شوې.
په خبرپاڼه کې ویل شوي، چې په دې ناسته کې دواړو خواوو د سیاسي، ډېپلوماټیکو، سوداګریزو او اقتصادي همکاريو او پر اوسنيو موضوعاتو بحث کړی.
په دې ناسته کې د ترکمنستان-افغانستان-پاکستان- هند د ټاپي پروژې د ګازو د نل لیکي، د برېښنا د لېږد او د فایبر مخابراتي شبکې پر جوړولو هم خبرې شوي.
ملا برادر د اذربایجان حکومت په رسمې بلنه د ایکو سازمان غونډې ته بلل شوی.
د ایکو سازمان غونډه نن او سبا د اذربایجان په پوزولي ښار کې ترسره کیږي. ملا برادر له غونډې یوه ورځ وړاندې د اذربایجان له لومړي وزیر سره په لېدنه کې په باکو کې د طالبانو د سفیر منلو غوښتنه هم کړې وه.
د طالبانو د بهرنیو چارو وزارت په یوې اعلامیې کې ویلي چې د روسيې سفیر دیمیتري ژیرنوف له امیر خان متقي سره په لیدنه کې د روسیې د حکومت پرېکړه اعلان کړې چې له مخې به یې روسیه د طالبانو حکومت په رسمیت وپېژني. طالبانو له نورو هېوادونو څخه هم د ورته اقدام هیله ښودلې.
د طالبانو بهرنیو چارو وزارت د پنجشنبه په ورځ (د چنګاښ ۱۲مه) په یوه خبرپاڼه کې ویلي، چې امیرخان متقي د روسیې د سفير ديميتري ژيرنوف سره په لیدنه کې د مسکو دغه پرېکړه ستايلې.
طالبانو ویلي، چې په دې لیدنه کې روسي ډېپلوماټ د طالبانو د حکومت د رسمیت پېژندنې پرېکړه اعلان کړه.
دوی زياته کړې: «د روسيې سفیر په دې ملاقات کې د روسیې د حکومت هغه پرېکړه رسما ابلاغ کړه چې پر بنسټ يې د روسيې فدراسيون د افغانستان اسلامي امارت په رسمیت پېژني.»
طالبانو د روسيي سفير له قوله ویلي، چې نوموړي دا د واړو هېوادونو د اړیکو د پياوړتيا لپاره مهم او تاريخی ګام وباله.
د طالبانو په خبرپاڼه کې راغلي، چې امیرخان متقي د مسکو دغه پرېکړه د دواړو هېوادونو ترمنځ د مثبتو اړیکو، متقابل درناوي او رغنده تعامل نوې مرحله یاده کړې.
امیرخان متقي په دې ليدنه کې زياته کړې: «د روسیې دغه واقعبينانه پرېکړه به د دواړو هېوادونو د اړیکو په تاریخ کې د یوه مهم پرمختګ په توګه ياده وي او د نورو هېوادونو لپاره د ورته اقدام یوه ښه بېلگه رامنځ ته کوي.»
متقي هيله ښودلې، چې په دې سره به د کابل او مسکو ترمنځ دوه اړخيزه همکاري لا پراخه شي.
امیرخان متقي وايي، چې واک ته له رسېدو را وروسته يې د نړۍ له هېوادونو سره د ډېپلوماټيکو اړیکو د پراختیا هڅې روانې کړي، چې مثبتې پايلې يې ورکړي.
نوموړي زياته کړې، چې د خپل متوازن سیاست له مخې د نړۍ له هېوادونو سره متقابلې او مثبتي اړیکې غواړي.
د هغه په خبره: «اوس کولی شو د جنوبي او مرکزي اسیا ترمنځ، د شمال او جنوب د اتصال، ترانزيټ او سوداګرۍ په برخه کې خپل اصلي مسولیت او مرکزي رول په ښه ډول ادا کړو.»
دا لومړی ځل نه دی چې طالبان د روسیې په تړاو دا ډول څرګندونې کوي؛ بلکې له دې وړاندې هم طالبانو د روسیې له خوا د رسمیت پېژندنې اعلان کړی و.
د یادې موضوع په تړاو د روسیې حکومت په رسمي ډول څه نه دي ویلي.
د روسیې د بهرنیو چارو وزارت وايي، مسکو له کابل سره د اقتصادي، انرژۍ، ترانسپورت، کرنې او کلتوري همکاریو پراخ فرصتونه ویني، تر څنګ یې د افغانستان د نوي سفیر د اعتبار لیکونو د سپارلو پر مهال د اړیکو ژورتیا مهمه بللې.
د افغانستان نوی سفیر ګل حسن تېره ورځ مسکو ته ورسېد او نن یې د روسیې د بهرنیو چارو وزارت مرستیال اندري رودینکو ته اعتبار لیکونه سپارلي. د روسیې د بهرنیو چارو وزارت د دغې لیدنې په اړه ویلي، چې دواړو لورو د دوه اړخیزو اړیکو پر پراختیا خبرې کړې دي.
روسي چارواکو ټینګار کړی چې له افغانستان سره د اقتصادي او سوداګریزو همکاریو ترڅنګ، د انرژۍ، ترانسپورت، کرنې او بنسټیزو خدمتونو په برخو کې پراخ فرصتونه شته، چې کولی شي د دواړو هېوادونو په ګټه وي.
په بیان کې دا هم ویل شوي چې د خلکو ترمنځ د دوستۍ د پیاوړتیا لپاره، د ښوونې او روزنې، کلتور او ورزش برخو کې د همکاریو ژورول ارزښت لري.
روسیه له تېرو څو کلونو راهیسې هڅه کوي له افغانستان سره د غیر سیاسي، خو ستراتیژیکو همکاریو زمینه پراخه کړي، او دا لیدنه د همدې هڅو یوه مهمه برخه بلل شوې ده.