علي خامنهیي په رسمي مراسمو کې له ۲۴ ورځني غیابت وروسته راښکاره شو
د ایران مشر علي خامنهیي د عاشورا په مناسبت مراسمو کې د خپل دفتر په حسینیه کې حاضر شو او له عامه ځایونو څخه تر اوږدې مودې غیابت وروسته بېرته راڅرګند شو.
د ایران مشر علي خامنهیي د عاشورا په مناسبت مراسمو کې د خپل دفتر په حسینیه کې حاضر شو او له عامه ځایونو څخه تر اوږدې مودې غیابت وروسته بېرته راڅرګند شو.
د ایران دولتي رسنیو د شنبې په شپه (د چنګاښ ۱۴مه) په دغو مراسمو کې د خامنهیي د ګډون انځورونه خپاره کړل.
د هغه وروستۍ علني څرګندېدنه د غبرګولي په ۲۱مه وه، یعنې دوه ورځې له هغې مخکې چې اسراییل بریدونه پیل کړي، چې هغه مهال یې د ایران د اسلامي شورا له استازو سره ولیدل.
له هغه وروسته، خامنهیي په هېڅ یوه عمومي مراسمو کې نهدی لیدل شوی، یوازې یې درې ویدیويي پیغامونه د ایران او اسراییل ترمنځ د جګړې په اړه له خپل پټ ځایه خپاره کړي دي.
د خامنهیي دا غیابت چې مخکې یې په ځلونو ویلي وو د جګړې په ورځ به د جګړې جامې اغوندي، له تبلیغاتي او سیاسي اړخه یې درنې پایلې لرلې.
په همدې ورځ بیا موساد د اېکس له لارې اعلان وکړ، چې د خامنهیي د مړینې شایعات ناسم دي او هغه ژوندی دی.
په دې پیغام کې راغلي: «موږ په ډاګه د خامنهيي د مړینې شایعات ردوو. یو ځل بیا ټینګار کوو چې هغه ژوندی دی.»
دا په داسې حال کې ده، چې د خامنهیي اړوند وېب پاڼې هم لیکلي: «د حسیني عاشورا له شپې سره هم مهاله، د امام خمیني په حسینه کې د عزادارۍ مراسم د اسلامي انقلاب د رهبر حضرت ایت الله خامنه يي او د یو شمېر نورو کسانو سره ترسره شول.»
په یادې وېب پاڼه کې د ورکړل شویو معلوماتو له مخې، په دې مراسمو کې "حجت الاسلام مسعود عالي" د امام حسین پاڅون ته په نغوتې سره وویل: «د ایران ملت د عاشورا لارښوونو پر بنسټ، هېڅکله به هم باطلې جبهې ته تسلیم نشي؛ ځکه د "هیهات مناالذله" شعار یې خپل سر مشق ټاکلی دی.»
له دې وروسته علي خامنهیي یوه حکومتي مداح ته په خطاب کې وویل: «که ستړی کېږې نه؛ د ایران ترانه ووایه.ـ»
د "ای ایران" په نوم یوه حماسي ترانه د اسراییل او ایران تر منځ له جګړې وروسته د ایران په مذهبي کړیو کې ډېره دود شوې ده.
