ګارډین ورځپاڼې په یوه تحلیلي مطلب کې لیکلي، چې اروپايي هېوادونه هڅه کوي وروسته له هغه چې د ایران د اټومي پروګرام له وروستیو خبرو اترو څنګ ته کړای شوي، خپل ځای او رول بېرته په منځني ختیځ کې ترلاسه کړي.
د دې راپور له مخې، اروپايي هېوادونه اندېښنه لري چې ډونالډ ټرمپ د ایران پر اټومي تاسیساتو تر برید وروسته، ښایي نور د ایران د وضعیت ثبات ته لېوالتیا ونه لري.
د امریکا ولسمشر په وروستیو ورځو کې څو ځلې ټینګار کړی، چې د تهران اټومي پروګرام «له منځه وړل شوی» دی.
ګارډین اوسنی بهیر د دې نښه بللې چې د اروپا نفوذ په تدریجي ډول په منځني ختیځ کې د قدرتونو په معادلاتو کې کمېږي.
