د طالبانو د امر بالمعروف او نهی عن المنکر وزارت محتسبانو تېره اوونۍ څلور کسان د کوډګرۍ په تور نیولي دي. دغه وزارت په یوه خبرپاڼه کې ویلي، چې یاد کسان د بلخ، میدان وردګو، غزني او بدخشان ولایتونو کې پېژندل شوي او نیول شوي دي.
طالبانو د نیول شویو کسانو د هویت په اړه جزیات نهدي ورکړي.
د طالبانو د امر بالمعروف قانون چې د ۱۴۰۳ لمريز کال د وږي میاشت کې توشیح شو، د امر بالمعروف وزارت محتسبانو ته یې د افرادو د نیولو صلاحیت ورکړی دی.
د دې قانون له توشیح وروسته، د طالبانو د امر بالمعروف او نهی عن المنکر وزارت اعلان وکړ، چې «د تعویذ لیکلو، سحر او کوډګرۍ کاروبار» په ټول افغانستان کې منع دی.
دا په داسې حال کې ده، چې د دې وزارت محتسبانو تر دې دمه په بېلابېلو ولایتونو کې لسګونه کسان د «سحر او جادو» په تور نیولي دي.
