د امریکا ولسمشر ډونالډ ټرمپ ویلي، چې د روسیې ولسمشر ولادیمیر پوتین د اوکراین جګړې پای ته رسولو اراده نه لري او داسې ښکاري، چې غواړي خلک ووژني. ټرمپ همدارنګه اوکراین ته د پټرایټ هوایي دفاع سیسټمونو لېږلو په اړه د ممکنه پرېکړې اشاره وکړه.
د امریکا ولسمشر ډونالډ ټرمپ د جولای په ۵مه وویل، چې د روسیې ولسمشر ولادیمیر پوتین د اوکراین جګړې پای ته رسولو کې هېڅ دلچسپي نه لري.
نوموړي وویل: «دا یوازې داسې ښکاري چې هغه غواړي ټولې لارې وازمایي او یوازې خلک ووژني. دا ښه نه ده. زه له دې خوشحاله نه یم.»
د دې خبرو وروسته ټرمپ د پوتین سره د جولای په ۳مه ټلیفوني خبرو ته اشاره وکړه، چې د یو ساعت په اوږدو کې ترسره شوې.
ټرمپ ویلي، چې پوتین په دې مکالمه کې څرګنده کړه چې روسیه به خپلې موخې په اوکراین کې تعقیب کړي.
ټرمپ د روسیې له خوا د اوکراین په بېلابېلو برخو کې د ډرونونو او میزایلو له لارې ترسره شوي بریدونو په اړه اندېښنه وښوده. دغه بریدونه په وروستیو اوونیو کې د ګڼو ملکي وګړو د وژل کېدو او ټپي کېدو سبب شوي دي.
ډونالډ ټرمپ همدارنګه یادونه وکړه، چې د اوکراین، امریکا او اروپا له خوا د بې قید اوربند غوښتنې ته په پام سره روسیه لا هم د ملکي زېربناوو په هدف بریدونه کوي.
له پوتین سره تر خبرو یوه ورځ وروسته، ټرمپ د اوکراین ولسمشر ولادیمیر زېلېنسکي سره هم خبرې وکړې او ویې ویل، دوی د "ستراتیژیکو" موضوعاتو په اړه خبرې کړي دي.
د پټرایټ هوایي دفاع سیسټمونو د لېږد په اړه ټرمپ وویل: «هو، موږ ممکن دا وکړو. هغوی ته یوه اړتیا ده ځکه چې هغوی خورا له سختو بریدونه لاندې دي.»
د ټرمپ دغه څرګندونې د امریکا د دفاع وزارت له خوا د پټرایټ میزایلو او دقیقې هدفي وسلو د لېږلو په اړه د ځنډ خبرونو وروسته راځي، چې په کییف کې یې اندېښنې پارولي دي.
په عین وخت کې، ټرمپ د روسیې په وړاندې د سختو ګامونو اخیستو غوښتنه کړې، خو بیا هم د روسیې پر ضد نوي بندیزونه نه دي لګول شوي.
