د ملګرو ملتونو سرمنشي پر اوکراین د روسیې روان بریدونه وغندل
د ملګرو ملتونو سرمنشي انتونیو ګوترېش د شنبې په ورځ د روسیې له خوا پر اوکراین د ډرون او توغندیو د وروستیو پراخو بریدونو لړۍ په کلکه وغندله.
د ملګرو ملتونو سرمنشي انتونیو ګوترېش د شنبې په ورځ د روسیې له خوا پر اوکراین د ډرون او توغندیو د وروستیو پراخو بریدونو لړۍ په کلکه وغندله.
پر اوکراین د روسیې د بریدونو دا لړۍ څه باندې درې کاله وړاندې پیل شوې او دواړو لوریو ته د مرګ ژوبلې د اوښتو سربېره لا هم دوام لري.
د ګوترېش ویاند سټیفان دوجاریک په یوه اعلامیه کې ویلي:«سرمنشي د روسیې فدراسیون له لوري د ډرون او توغندیو برېدونو وروستۍ پراخه لړۍ په کلکه غندي. ویل کېږي چې دا د جګړې په درې کلنه موده کې تر ټولو ستر بریدونه دي.»
د ملګرو ملتونو سرمنشي د روسیې د یادو بریدونو له امله د ملکي وګړو د مرګژوبلې او خطرناک وضعیت په اړه هم ژوره اندېښنه ښودلي ده.
ګوترېش ویلي، چې پر ملکي وګړو او تاسیساتو بریدونه د نړۍوال قانون له مخې منع دي او باید ژر تر ژره ودرول شي.
له دې سره، د ملګرو ملتونو سرمنشي د جګړې د پای ته رسولو غوښتنه کړې ده او وايي، ژر تر ژره دې بې قید او شرطه اوربند وشي.
