د ملګرو ملتونو په غونډه کې د روسیې استازي د لوېدیځو هېوادونو پر هغه دریځ نیوکه وکړه، چې د چین، روسیې، ایران او پاکستان له لوري له طالبانو سره د تعامل لپاره وړاندې شوي وړاندیزونه نه مني.
نوموړي وویل، لوېدیځ هېوادونه له طالبانو سره د تعامل ملاتړ نه کوي، په داسې حال کې چې دا فکر له وړاندې ناکامه شوی دی.
هغه زیاته کړه: «د افغانستان کنګل شوې شتمنۍ باید خلاصې شي څو د روغتونونو، سړکونو او ښوونځیو جوړولو لپاره وکارول شي.»
یو اړخیز بندیزونه باید لرې شي، ځکه له دې تدابیرو پرته د افغانستان ښځو، نجونو او ماشومانو ته رسېدګي ناشونې ده.»
د روسیې استازي وویل: «موږ د دې له امله نا امیده یو چې ځینې لوېدیځ هېوادونه طالبانو سره د تعامل لپاره د جوړو شویو میکانیزمونو ملاتړ نه کوي او نه هم د روسیې، چین، ایران او پاکستان وړاندیزونه په پام کې نیسي.»
یاد هېوادونه ټینګار کوي، چې بشري حقونه باید طالبانو سره د تعامل یوازینی محور ونه ګرځي، بلکې نړۍوالې ټولنې ته پکار ده چې له طالبانو سره عملي او رغنده تعامل ولري.
