د کرملین ویاند دیمتري پېسکوف ویلي، روسیې د امریکا د ولسمشر ډونالد ټرمپ هغه څرګندونې څارلې چې پکې یې د برېکس ډلې د ملاتړو هېوادونو پر وارداتي توکو د ۱۰سلنه اضافي تعرفې د لګولو ګواښ کړی دی.
پېسکوف زیاته کړه: «موږ د ټرمپ څرګندونې لیدلې دي، خو د اوس لپاره به له تبصرو ډډه وکړو. دا موضوع باید د نړۍوال اقتصاد او سوداګرۍ اصولو له مخې وڅېړل شي.»
د یادونې ده، برېکس ډله چې پکې روسیه، چین، هند، برازیل، سوېلي افریقا او یو شمېر نور هېوادونه شامل دي، د یو څو قطبي نړۍوال نظم پلویان دي او هڅه کوي نړۍوال اقتصادي او سیاسي توازن ته بدلون ورکړي.
