په داسې حال کې چې د اوکراین جګړه لا پسې توده شوې او روسیه د اوربند غوښتنې ته غاړه نه ږدي، د ناټو سرمنشي واشنګټن ته سفر کوي او ټرمپ وایي، چې په نږدې ورځو کې به د روسیې پر ضد د نویو تدابیرو په اړه مهم اعلان وکړي.
د ناټو مطبوعاتي دفتر د جولای په ۱۳مه اعلان وکړ، چې د ناټو سرمنشي مارک روټه به د جولای په ۱۴مه او ۱۵مه واشنګټن ته سفر وکړي.
دا سفر په داسې حال کې ترسره کېږي چې د امریکا ولسمشر ډونالډ ټرمپ له دې مخکې ویلي وو، چې نیت لري د جولای په ۱۴مه د روسیې په اړه یو "مهم" اعلان وکړي ـ داسې اعلان چې ښايي د اوکراین د جګړې په تړاو د امریکا په سیاستونو کې بدلون راولي، په داسې حال کې چې له کرملېن سره اړیکې ورځ تر بلې خرابېږي.
ټرمپ د جولای په ۱۰مه اېن بي سي نیوز ته ویلي وو: «زه فکر کوم چې د روسیې په اړه به د دوشنبې په ورځ یو مهم بیان ولرم.»
نوموړي له دې زیات جزییات ورنه کړل، خو زیاته یې کړه: «زه له روسیې نه خفه یم، خو راځئ چې وګورو په راتلونکو څو اوونیو کې څه پېښېږي.»
که څه هم د ناټو مطبوعاتي دفتر د روټه د سفر د اصلي هدف په اړه څه نهدي ویلي، خو ټرمپ NBC ته وویل، چې امریکا له ناټو سره یو نوی توافق کړی چې له مخې به یې امریکایي وسلې اوکراین ته انتقالېږي.
ټرمپ وویل: «موږ وسلې ناټو ته استوو او ناټو د دغو وسلو پیسې ۱۰۰٪ ورکوي. نو څه چې کېږي، هغه دا دي چې وسلې به ناټو ته ځي او بیا به ناټو دا وسلې اوکراین ته ورکوي او لګښت به هم ناټو پرې کوي.»
د هغه په وینا، دا توافق د ناټو د تېرې میاشتې په سرمشریزه کې نهايي شوی و، ټرمپ په دغه سرمشریزه کې د اوکراین لپاره د نورو "پېتریوت" توغندیو استولو ملاتړ څرګند کړی و.
دا په داسې حال کې ده، چې روسیې له اوربند سره موافقه نه ده کړې او دغه راز یې پر اوکرایني ښارونو پراخ بریدونه هم ډېر کړي.
