د قزاقستان ولسمشر قاسم جومارت توکاېیف د افغانستان لپاره د دغه هېواد له ځانګړي استازي سره لیدلي او له هغه سره یې د کابل او استانه ترمنځ د دوه اړخیزو همکاریو پر پیاوړتیا ټینګار کړی دی.
توکایف خپل ځانګړي استازي ته سپارښتنه کړې، چې د سوداګرۍ، اقتصاد او بشرپاله مرستو په برخو کې د دواړو هېوادونو ترمنځ د ګټورو اړیکو د پراخېدو لپاره هڅې وکړي.
نوموړي همداراز په منځنۍ اسیا او افغانستان کې د دوامداره پراختیایي موخو لپاره د ملګرو ملتونو د سیمهییز مرکز له ظرفیت نه اغېزمنه ګټه اخیستنه مهمه بللې ده. دا مرکز څه موده مخکې د قزاقستان په الماتا ښار کې پرانیستل شو.
د قزاقستان ولسمشر د افغانستان د ټیکاو او امنیت د ملاتړ په برخه کې د بشري مرستو او روزنیزو پروګرامونو د دوام لپاره د خپل هېواد پر ژمنې یو وار بیا ټینګار کړی دی.
د یادونې ده، چې قزاقستان پر افغانستان د طالبانو تر واکمنېدو وروسته له دغې ډلې سره په بېلابېلو برخو کې ښه راکړه-ورکړه لري؛ خو لا یې دغه ډله په رسمیت نهده پېژندلې.
