د کوچي شاهین په نوم د طالبانو یو غړي پر خپله فېسبوک پاڼه په یوه لیکنه کې پر خپلې تېرې جګړې پېښماني ښودلې ده. هغه لیکلي چې په تېر وخت کې به ورته سپینږیرو نصیحت کاوه چې دا د واک او چوکۍ جګړه ده او وطن مه ورانوئ.
دغه طالب سرتېري زیاته کړې چې په هغه وخت کې دا خبرې دوی ته هسې ټوکې ښکارېدي، خو اوس ورته د هغو خبرو څرک او حقیقت معلوم شوی دی.
کوچي شاهین په دغه خپره شوې لیکنه کې اعتراف کړی چې اوس ورته څرګنده شوې چې د دوی په سرونو باندې نورو خلکو ځانونه واک او چوکیو ته ورسول.
د هغه په وینا، نه د دغه ولس غم شته او نه هم د اسلام، بلکې دا هر څه یوازې تش تبلیغات وو چې دوی پرې تېر ایستل شوي وو.
نوموړي دغه څرګندونې د نیمروز ولایت په مارګو دښته کې د یو شمېر ځوانانو د لادرکه کېدو او د ځینو د جسدونو پیدا کېدو ته په غبرګون کړې دي.
