د نورستان په مرکز پارون ښار کې د خونړیو سېلابونو راوتو سره هممهاله، د طالبانو د هوا پوهنې ادارې خبر ورکړی چې سبا سېشنبه د چنګاښ ۳۰مه په ۱۰ ولایتونو کې د تېز باران، تېزو بادونو، دوړو او سېلابونو راوتو اټکل شوی.
دغې ادارې د یوې خبرپاڼې په خپرولو سره ویلي چې دغه اټکل د سېشنبې په ورځ د چنګاښ ۳۰مه د بدخشان، نورستان، کونړ، لغمان، ننګرهار، لوګر، پکتیا، خوست، پکتیکا، او غزني ولایتونو لپاره شوی دی.
په خبرپاڼه کې چې د باران کچه په بېلابېلو سیمو کې له ۱۰ څخه تر ۳۰ ملي متره پورې اټکل ششوې ده او همدارنګه په مرکزي، ختیځو، سوېل ختیځو، لویدیځو او شمالي ولایتونو کې د تېزو بادونو، خاورو او دوړو پېښېدو اټکل هم شته چې تېزوالی به یې په بېلابېلو سیمو کې په ساعت کې له ۵۰ څخه تر ۱۰۰ کیلومتره وي.
دا په داسې حال کې ده، چې نن د نورستان په مرکز پارون ښار کې د سختو سېلابونو له امله ګڼو کسانو ته مرګژوبله اوښتې ده.
