په کندهار کې یو بهرنی سیلانی په یوه ټرافیکي پېښه کې ټپي شوی

د طالبانو د کندهار د امنیه قوماندانۍ مسوولان وايي، دغه سیلانی چې د پولنډ اوسېدونکی دی نن سهار د دامان ولسوالۍ د ارغستان پله په سیمه کې په یوه ټرافیکي پېښه کې ټپي شوی دی. دغه پېښه نن سهار هغه مهال رامنځته شوه چې د یاد سیلاني موټرسایکل له یوه ټونس ډوله باروړونکي موټر سره وجنګېده.

د طالبانو د کندهار امنیتي مسوولین د دغې پېښې لامل د یاد سیلاني له لوري ګړندی تګ په ګوته کوي او زیاتوي چې د درملنې لپاره میرویس حوزوي روغتون ته لیږدول شوی او روغتیايي وضعیت یې هم د ډاډ وړ دی.