د خېبر پښتونخوا ایالت د بنو ولسوالۍ د پولیسو مشر سجاد خان ویلي، چې د استخباراتي معلوماتو پر بنسټ یې له تېرې شپې راهیسې د وسلهوالو یو شمېر پناه ځایونه په نښه کړي دي. هغه ادعا کړې، چې ۶ وسلهوال یې په دغه بریدونو کې وژلي او درې نور یې ټپیان کړي دي.
یوه ۱۵ کسیزه ډله پر موټرسایکلونو د افغانستان، تاجکستان او ازبکستان پر لور روان شوه، څو د اقتصادي همکاریو سازمان (ECO) غړو هېوادونو ترمنځ د ګرځندوئ او کلتوري اړیکو پیاوړتیا ته وده ورکړي
دا سفر د پنجاب د سیاحت پراختیایي ادارې (TDCP) په نوښت پیل شوی او ټاکل شوې ده، چې پلاوی به یې د ۲۳ ورځو په ترڅ کې ۵۰۰۰ کیلومتره مزل وکړي. د دوی مسیر له اسلاماباده تر کابل، کندهار، سمرقند، بخارا او تاشکند پورې غځېدلی دی.
د ډلې مشر مکرم ترین ویلي، موخهیې سیمهییز تفاهم، سوله او دوستي پراخول دي.
بل غړی نظر سعید خان وایي، چې دوی هڅه کوي د سیمې له نورو موټرسایکلچلوونکو سره اړیکې ټینګې کړي او پاکستان ته یې دعوت کړي.
د پنجاب د سیاحت پراختیا ادارې مشر، ډاکټر ناصر محمود، دغه سفر د سیمې د سیاحت، دوستۍ او کلتوري یووالي لپاره یو مهم ګام وباله او ویې ویل چې دا ډول نوښتونه پاکستان نړیوالو ته په مثبت شکل ورپېژني.
د معلوماتو له مخي، د پاکستاني طالبانو تحریک«ټي ټي پي» د بنو په میریان سیمه کې د پولیسو پر یوه مرکز د ډرون برید کړی او ۷ تنو پولیسو ته یې مرګ ژوبله اړولې ده. ځايي رسنیو د ټي ټي پي د هوايي برید ویډيو هم خپره کړې ده.
د سرچینو د معلوماتو له مخي، دغه برید د پنجشنبې په ورځ (د زمري ۱۰مه) د بنو په میریان سیمه کې د پوليسو پر یوه مرکز شوی.
ځايي سرچینو د لومړنیو معلوماتو له مخي ویلي، چې په برید کې ۷ تنو پوليس ته مرګ ژوبله اوښتې، او د لا ډیرو معلوماتو ورکولو څخه یې ډډه کړې ده.
پوليسو ویلي، چې په پېښه کې ټپي شوي پولیس يې نږدې روغتون ته لېږدولي دي.
له دې سره هم مهاله په بنو کې ځايي پولیسو خبر ورکړی، چې د پاکستاني طالبانو تحریک یو ډرون يې ویشتل او را غورځولی یې دی.
تر اوسه د دې پيښو په اړه د پاکستاني طالبانو تحریک څه نه دي ویلي.
د پاکستان د جمعیت علمای اسلام مشر مولانا فضلالرحمن وايي، د پاکستان د ملي حاکمیت او دولت د پریکړو د خپلواکۍ په اړه ژور اندېښمن دی. نوموړي ټینګار کړی چې دا د کمزورې حکومتولۍ نښه ده چې د هېواد د تیلو تړونونه یا له هند سره د اوربند معلومات له ډونالډ ټرمپ څخه ترلاسه کېږي.
مولانا فضل رحمان د پنجشنبې په ورځ پر خپل اېکس ولیکل، چې «زه د یو پاکستاني وګړي په توګه د پاکستان د خپلواکۍ لپاره سخت اندېښمن یم. دا یوه شرموونکې خبره ده چې موږ ته د تیلو د تړون خبر هم له ټرمپ څخه راځي او له هند سره د جنګ او سولې پرېکړه هم له هغه واورو».
نوموړي پر حکومت نیوکه کړې، چې له پارلمان، ایالتونو او ولس سره له همغږۍ پرته داسې سترې پرېکړې کوي، چې ملي حاکمیت، اساسي قانون او د ایالتونو حقوق تر پوښتنې لاندې راولي.
مولانا زیاته کړې، « د اساسي قانون له مخې، دا ډول تړونونه باید د پارلمان، ایالتونو او ولس په باور کې اخیستو سره وشي».
نوموړی وايي، چې دا یوازې د سوداګرۍ مساله نه ده، بلکې د ملي حاکمیت او د ایالتونو د راتلونکو حقونو موضوع ده.
مولانا غوښتنه کړې، چې حکومت باید ژر تر ژره پارلمان ته توضیحات وړاندې کړي او د تړونونو بشپړ جزئیات خلکو ته روښانه کړي.
د متحده ایالاتو او پاکستان ترمنځ د پنجشنبې په ورځ یوه نوې سوداګریزه هوکړه وشوه، چې د پاکستان د ماليې وزارت وایي له مخې به تعرفې راکمې شي او په بېلابېلو برخو لکه انرژي، کانونو، معلوماتي ټکنالوجي او کریپټو کې به پانګونه زیاته شي.
د پاکستان د ماليې وزیر محمد اورنګزیب، چې د خبرو اترو د وروستي پړاو مشري یې کوله، وویل، « له اقتصادي اړخه دا هوکړه یوازې سوداګریزه نه، بلکې یوه ستراتیژیکه همکاري ده. موږ د دې لپاره کار کاوه چې تجارت او پانګونه دواړه یو ځای مخ ته لاړ شي».
پاکستان له امریکا سره د صادراتو په تړاو د ۲۹ سلنې تعرفې له خطر سره مخ و، خو دا تعرفه وځنډول شوه څو د اګست تر لومړۍ نېټې خبرې وغځیږي. اسلام اباد هڅه کوي چې د ویتنام د۲۰سلنه او د هند ۲۵ سلنه په پرتله یې تعرفې ټيټې وساتل شي.
ډونالډ ټرمپ پر خپله ټولنیزه شبکه ولیکل، چې « موږ له پاکستان سره یوه هوکړه نهایی کړې، چې له مخې به پاکستان او متحده ایالات د دغه هېواد د تیلو سترو زېرمو د پراختیا لپاره یوځای کار کوي».
د پاکستان د فیصلاباد ترهګرۍ ضد ځانګړې محکمې (ATC) د می ۹مې نېټې د تاوتریخوالي اړوند قضیه کې د تحریک انصاف ګوند دریو جګپوړو غړو عمر ایوب، شبلي فراز او زرتاج ګل هر یوه ته ۱۰-۱۰ کاله د بند سزا واوروله.
دا تاوتریخوالی په ۲۰۲۳ کال کې هغه مهال رامنځته شو، چې مظاهرهچیانو په ټول هېواد کې پر پوځې تاسیساتو بریدونه وکړل.
محکمې په خپله پرېکړه کې د ټولو ۱۸۵ تورنو کسانو له ډلې ۱۰۸ کسانو ته سزا واوروله، چې پکې د پاکستان د سني اتحاد شورا مشر او د ملي اسامبلۍ غړی صاحبزاده حمید رضا هم شامل دی؛ نوموړي ته هم ۱۰ کاله بند سزا ورکړل شوې ده.
په همدې قضیه کې د تحریک انصاف پخوانی ویاند فواد چودري، زین قریشي او خیال کاسترو له تورونو بري شوي دي.
د پښتونخوا ملي عوامي ګوند مشر محمود خان اڅکزی وايي، پاکستان، افغانستان، ایران، ازبکستان او د دې سیمې نور هېوادونه د خپلو طبیعي سرچینو له امله د نړۍ د ځواکمنو قدرتونو له خوا د جګړې ډګر جوړیدای شي. اڅکزی وايي، چې هېوادونه او ایالتونه د لرګیو او مرمیو په زور نه شي چلېدای.
د سویلي پښتونخوا ملت پال سیاستوال او د پښتونخوا ملي عوامي ګوند مشر محمود خان اڅکزي په اسلام اباد کې ټول ګوندیز کنفرانس کې ویلي، چې که د هېوادونو واکمنان له پوهې کار وانخلي، نو پاکستان، افغانستان، ایران، ازبکستان او د سیمې هېوادونه د خپلو طبیعي زیرمو له امله د سترو قدرتونو له خوا د جګړي ډګر جوړیدای شي.
نوموړي ویلي: « زموږ دا سیمه به زموږ د سرچینو له امله د مستو غوایانو لپاره د جګړې ډګر شي. اوس زموږ د سیمي د هېوادونو د واکمنانو د هوښیارۍ د ازموینې وخت دی. داسیمه په ګډې پوهې سره ژغورل کیدای شي.»
محمود خان اڅکزي په باجوړ او مومند کې د ملکي وګړو وژل کېدو ته په اشاره د پاکستان پر حکومت سختې نیوکې کړې دي. نوموړي ویلي، چې په باجوړ کې د نظامیانو له خوا د ملکي وګړو ټول وژنه روانه ده.
اڅکزي زیاته کړه:« په باجوړ کې قتل عام شروع دی، ګرځبندیز لګول شوی، له پاسه زموږ چورلکې دي او خلکو باندې بمبار کوي. د څه لپاره؟ ایالتونه د مرمیو تر سیوري لاندې نه چلېږي، هېوادونه د لرګیو په زور نه شي چلېدای بلکې هېوادونه د اساسي قانون لاندې چلېږي.»
په اسلام اباد کې د پاکستان د ټول ګوندیز کنفرانس پرمهال د نورو ګوندونو غړو او مشرانو هم د شهباز شریف پر حکومت، پوځ او عدلي ادارو سختې نیوکې کړې دي.
د حکومت د مخنیوي له هڅو سربیره هم په اسلام اباد کې د ټولو ګوندو ګډ کنفرانس جوړ شو او سبا به هم دوام ولري.