واشنګټن پوسټ رپوت ور کړی، چې پاکستاني چارواکو د پي او ار کارت لرونکو افغان کډوالو د جبري ستنولو پرېکړه کړی ده. په خیبر پښتونخوا کې د کډوالو کمېشنر شکیل خان ویلي: « هغه افغان کډوال چې په پاکستان کې غیرقانوني ژوند کوي، په درناوي بېرته لېږل کېږي».
د پاکستان مرکزي حکومت له لوري د (PoR) کارت لرونکو لپاره د پاتې کېدو د وخت تمدید غوښتنه رد شوې، چې له املهیې شاوخوا ۱،۴ میلیونه افغانان د قانون له مخې نور د پاتې کېدو اجازه نه لري.
دغو کارتونو د جون میاشتې په پای کې اعتبار له لاسه ورکړی و. ډېری افغانانو هیله لرله چې یو کلن تمدید به ورکړل شي، څو د خپلو چارو ، د جایدادونو پلور او کاروباري اړیکو د پای ته رسولو فرصت ومومي.
د PoR کارت لرونکو ترڅنګ، شاوخوا ۸ سوه زره نور افغانان د «افغان سټیزن کارډ»لرونکي هم دي، چې پولیس وایي دوی هم غیرقانوني ګڼل کېږي.
د ملګرو ملتونو د کډوالو ادارې ویلي، چې د دې کال د جون تر میاشتې پورې شاوخوا ۱،۲ میلیونه افغانان له ایران او پاکستان نه جبري افغانستان ته ستانه شوي دي. د دغې ادارې په وینا، دا پراخ جبري ایستل د افغانستان اوسنی نازک وضعیت نور هم بېثباته کولی شي.
د حکومت او امنیتي ادارو دوه سرچینو، چې له نوم اخیستو یې ډډه کړې، واشنګټن پوسټ ته ویلي چې پولیس د پاکستان په بېلابېلو برخو کې افغانان نیسي او د د ډېورنډ پر لور یې استوي. سرچینې زیاتوي، که څه هم ډله ییزې نیونې نه دي پیل شوې، خو پولیسو ته لارښوونه شوې چې کور په کور تلاشي او پلټنې ترسره کړي.
د خیبر پښتونخوا د کډوالو کمېشنر شکیل خان هم رسنیو ته ویلي: « هغه افغان کډوال چې په پاکستان کې غیرقانوني ژوند کوي، په درناوي بېرته لېږل کېږي».
نوموړی وايي دا تر اوسه د فدرالي حکومت تر ټولو جدي اقدام دی.
په تېرو څلورو لسیزو کې میلیونونه افغانان د جګړې، سیاسي بېثباتۍ او اقتصادي سختیو له امله پاکستان ته کډه شوي. دا نوی کمپاین د ۲۰۲۳ کال له پراخ اقدام وروسته بیا پیل شوی، چې هدف یې د پاکستان دننه پر غیرقانوني میشتو بهرنیانو فشار راوستل و.
د پاکستان د کورنیو چارو وزارت، چې د دې کمپاین مشري کوي، تر اوسه د دې پرېکړې په اړه رسمي څرګندونې نه دي کړې.
