د طالبانو سترې محکمې ویلي، چې په تېره یوه اونۍ کې یې په میدان وردک، کابل، زابل، کاپیسا، بغلان او کندوز ولایتونو کې ۳۱ کسان په عام محضر کې په دُرو وهلي دي. دوی زیاتوي په تېره یوه میاشت کې د افغانستان په بېلا بېلو ولایتونو کې ۸۱ کسان په عام محضر کې په دُرو وهلي دي.
د طالبانو سترې محکمې د شنبې په ورځ د خپل اونیز راپور په خپرولو سره ویلي، چې شپږ ولایتونو کې یې ۳۱ کسان په دُورو وهلي دي خو د یادو کسانو هویت یې نه دی په ډاګه کړی.
طالبانو تېره اونۍ په خپلو خبرپاڼو کې ویلي و، چې په کابل او زابل ولایتونو کې یې د یوې ښځې په ګډون ۱۴ کسان د شرابو، ټابلیټ کا او نامشروع اړیکو په تور په دُرو وهلي دي.
طالبان نږدې هره ورځ د بېلابېلو تورنو له کبله عام خلک په عام محضر کې په دُرو وهي، چې دغه کړنې د بشري حقونو د سازمانونو له خوا سخت غندل شوي.
د بشري حقونو سازمانونو او نړۍوالو بنسټونو په وار-وار له طالبانو غوښتي، چې بدنې سزاګانې ودروي؛ خو طالبان وايي، د شریعت په پلي کولو د هېچا پروا نه کوي.
۲۴ کلن مصطفی مهمند چې د کندهار اصلي اوسیدونکی دی، پر افغانستان د طالبانو له بیا واکمنیدو وروسته په ۲۰۲۱ کال کې له خپلې کورنۍ سره اسټرالیا ته کډوال شو.
مهمند اوس په اسټرالیا کې د نجونو د یوه ځاي کلپ روزونکی دی. نوموړي ته د ښو خدماتو له امله د اسټرالیا د نیو ساوت ولز ایالتي پارلمان ستاینلیک ورکړی.
مصطفی مهمند له افغانستان انټرنشنل سره مرکه کې وویل:« زه چې کله استرالیا ته راغلم ما خپل فوټبال ته ادامه ورکړه او په یو ځايي کلپ کې مې لوبه کوله، د خپل کلپ له خوا راته د نجونو د یوه ځاي کلپ لپاره د روزونکي وړاندیز وشو او ما ځکه ومانه چې دا زما لپاره یو لوی افتخار و.»
هغه زیاته کړه: «د کومې لوبډلې روزونکی چې یم، په لږ وخت کې ډېرې لاسته راوړنې لري، ستاینلیک د همدې له امله راکړل شوی دی.»
مهمند دا هم وویل چې هیله یې داده چې روزونکي لوبغاړي یې د اسیا تر څنګ په ټوله نړۍ کې وځلیږي.
د جمهوریت له پرځېدو شاوخوا څلور کاله تېریږي، خو مهمند لا هم هغه ورځې یادوي او دردیږي. هغه وایي د وطن پرېښودل ورته ډېر سخت و.
مصطفی مهمند وایي، فوټبال یوازې لوبه نه ده بلکې دا د نړۍ ژبه ده. هغه هیله لري چې په دې برخه کې خپله وړتیا وښیي او ارمان لري چې په دې برخه کې پرمختګ وکړي.
مصطفی مهمند چې په استرالیا کې په زاک مشهور دی د کندهار په هوايي ډکر او د یاد ولایت د منتخبه لوبډله کې هم لوبې کړي دي.
هغه د جمهوریت له پرځېدو مخکې د افغانستان د فوټبال ملي لوبډلې ته هم لار پیدا کړې وه او څو لوبې یې هم کړې دي.