د لندن مېټروپولیټن پولیسو ویلي، چې د شنبې په ورځ یې ۱۵۰ هغه لاریون کوونکي نیولي، چې د بریتانیا د هغې پرېکړې پر ضد یې مظاهره کوله چې د «فلسطین ملاتړ کوونکې اعتراضیه ډله» یې غیرقانوني اعلان کړې ده. پولیس زیاتوي، د نورو لاریونوالو د نیولو لړۍ لا هم روانه ده.
پولیسو ویلي چې دغه نیونې هغه مهال وشوې، چې کڼو لاریون کوونکو د بریتانیا پارلمان په څلور لارې کې راټول شوي وو او د فلسطین ملاتړ کوونکي اعتراضیه ډلې د ملاتړ شعارونه یې ورکول.
رویټرز ویلي، چې یو شمېر لاریون کوونکو د فلسطین بیرغونه له ځان سره لېږدول او «شرم دې وي» او «له غزې لاس واخلئ» شعارونه یې ورکول.
دغو لاریون کوونکو له ځان سره په لیکلي بڼه هم ځیني شعارونه چې «زه له نسل وژنې سره مخالفت کوم، زه د فلسطین په ملاتړ اعتراضیه ډلې ملاتړ کوم» شعارونه هم لېږدول.
د جولای په میاشت کې د بریتانیا پارلمان د ترهګرۍ ضد قوانینو له مخې، د «فلسطین په ملاتړ اعتراضیه ډله» له هغه وروسته منع اعلان کړه، چې د دې ډلې ځیني غړو د بریتانیايي ځواکونو یوې پوځي اډې ته ننوتل او د اسراییل ملاتړې ځینې الوتکې یې زیانمې کړې.
د دغه بندیز له مخې، د یادې ډلې غړیتوب د جرم په توګه ګڼل کېږي او تر ۱۴ کلونو د بند سزا لري.
